Қарағанды облысында 15 наурызда болатын референдумды қолдаған спорттық челлендж өтті. Оған өңірдің 300-ден астам тұрғыны қатысты.

Қарағанды және Сарань қалаларында ұйымдастырылған шаңғы жарыстары өңір тұрғындарының қоғамдық белсенділігі мен оң өзгерістерді қолдауға деген ұмтылысының айқын көрінісіне айналды.

Қос қалада өткен іс-шараға әртүрлі жастағы 300-ден астам адам қатысты. Жарыс атмосферасы бірлік рухына, өзара қолдауға және елдегі тағдыршешті үдерістерге белсенді қатысудың маңызын терең түсінуге бағытталды.

Коалиция мүшесі Александр Бочаровтың айтуынша, мұндай іс-шара спорт пен салауатты өмір салтын насихаттап қана қоймай, адамдарды жалпыұлттық құндылықтар төңірегінде топтастырады.

«Бұл спорттық челлендж — азаматтық белсенділіктің ортақ құндылықтар төңірегінде адамдарды біріктіретінінің нақты дәлелі. Әртүрлі буын өкілдерінің бір уақытта стартқа шығу арқылы оң өзгерістерді қолдап, ел болашағы үшін ортақ жауапкершілікті сезінетінін айқындайды», - деді ол.

Өзге де ұйымдастырушылар спорттың ауызбіршілікті нығайтудың тиімді алаңы екенін атап өтті. Олар алдағы уақытта осындай іс-шаралар жалғасын табатынына сенім білдірді. Енді қатысушылар қатарын көбейту және спорт пен азаматтық белсенділікті ұштастыру дәстүрін нығайту бағытындағы жұмыстарды жандандыру жоспарланып отыр.