Конституциялық комиссия Қазақстан Президентіне өңделген жаңа Конституция жобасын республикалық референдумға шығаруды ұсынатынын хабарлады. Бұл туралы Комиссия төрайымы Эльвира Азимова айтты.
– Комиссия Президент жанындағы консультативтік-кеңестік орган болғандықтан, көпшіліктің пікірін ескере отырып, Мемлекет басшысына өңделген жаңа Конституция жобасын республикалық референдумға шығаруды ұсынуды қажет деп есептеймін, – деді Азимова.
Ол референдум әрбір Қазақстан азаматына өз позициясын білдіруге және конституциялық құқықтарын жүзеге асыруға мүмкіндік беретінін атап өтті.
– Егер Президент референдум өткізу туралы шешім қабылдаса, Конституциялық комиссияның миссиясы орындалған болып саналады. Сонымен қатар, комиссия мүшелері өз жұмыстарын жалғастырады, бұл туралы бүгін эксперттер де айтты. Халықпен кездесулер жалғасады, – деп қосты Комиссия төрайымы.