Мәжіліс депутаты, «Ақ жол» Демократиялық партиясының төрағасы Азат Перуашев қазіргі модельде тек екі нысан – мемлекеттік және жеке меншік қарастырылғанын, бұл қазіргі экономикалық шындықтарды толық көрсетпейтінін атап өтті. Ал қазіргі экономистер кем дегенде бес-алты түрлі меншік түрін бөліп көрсетеді.

– Финляндия, Литва, Латвия, Әзербайжан және басқа елдерде мемлекеттік және жеке меншікпен қатар конституцияларда муниципалды меншік те көрсетілген. Қытай, Бразилия, Үндістан конституцияларында оларға қосымша коллективтік немесе кооперативтік меншік енгізілген. Кейбір елдерде қоғамдық меншік, яғни ашық қор нарығында тіркелген компаниялардың меншігі ерекше бөлінген. Басқа елдерде экономикалық әртүрлілікті ынталандыру мақсатында конституцияларда меншік түрлерінің тізімі шектелмеген. Жалпы саяси экономия теориясында жеке меншік классикалық түрде өндіріс құралдарына, яғни коммерциялық мақсатта пайда алу үшін қолданылатын капиталға ие болу құқығы ретінде анықталады, – деді ол.