«Әділетті және Прогрессивті Қазақстанның Халықтық Конституциясы үшін!» коалициясының Қызылорда облысы, Қазалы ауданындағы өкілдері қаржы саласында еңбек ететін қызметкерлермен кездесу өткізді. Жиынға коалиция жетекшісі Ғазиз Әліш және коалиция мүшелері қатысты.
Жүздесу «Әділетті заң – тұрақты экономика кепілі» тақырыбы аясында өтті. Коалиция мүшелері алдағы 15 наурызға белгіленген республикалық референдумның маңыздылығына тоқталып, Конституцияға енгізілетін өзгерістердің негізгі бағыттарын түсіндірді. Спикерлердің айтуынша, ұсынылып отырған реформалар сот жүйесінің тәуелсіздігін күшейтуге, сыбайлас жемқорлықтың алдын алуға, мемлекеттік қаржы басқаруындағы ашықтықты арттыруға және азаматтардың құқықтары мен бостандықтарын қорғауға бағытталған.
«Қаржы саласының әділетті әрі тұрақты жұмыс істеуі – бүкіл экономиканың сенімді тірегі. Жаңа Конституция жобасында «жылдам дамуды» енгізу ұғымы ұсынылады. Бұл кейбір өңірлердің қарқынды экономикалық дамуын қамтамасыз етуге және қаржылық басқару саласында ерекше құқықтық режим орнатуға мүмкіндік береді. Сонымен қатар Конституцияда шетелдік көздерден алынатын коммерциялық емес ұйымдардың ақшалай қаражаттары мен активтері туралы ақпараттың ашықтығы жөніндегі ереже азаматтық бастамаларды шектеуге немесе кемсітуге емес, қоғамдық-саяси кеңістікте ашықтық пен сенімді қамтамасыз етуге бағытталған», – деді Ғазиз Әліш.
Кездесу соңында қаржы саласының қызметкерлері ел болашағына қатысты маңызды шешімдер қабылданатын кезеңде белсенді азаматтық ұстаным танытуға дайын екендерін білдіріп, алдағы референдумға қатысудың маңызын атап өтті.
