Солтүстік Қазақстан облысының Жамбыл ауданындағы №164 сайлау учаскесіне Алдамасовтар әулетінің үш буыны дауыс берді. Жерлестерінің ерекше назарын отбасының үлкені – 91 жастағы Күлән Қапезқызы Алдамасова аударды. Құрметті жасына қарамастан, ол референдумға өзі келіп, азаматтық таңдауын жасауды жөн көрді.
Алдамасовтар отбасы шын мәнінде интернационалды әулет болып саналады. 8 немере мен 19 шөбере арасында түрлі ұлт өкілдері – қазақтар, орыстар, украиндар, армяндар және молдавандар бар. Туыстары әженің өмір жолына үлкен құрметпен қарап, оны өздеріне үлгі тұтады. 91 жасында да Күлән апай сергектігін сақтап, өмірге деген оптимизмін жоғалтпай, келген қонақтарды әрдайым шынайы қуанышпен қарсы алады.
«Өмір әрқашан оңай бола бермейді. Бірақ ең бастысы – рухтың мықтылығын сақтау, отбасыңды жақсы көру және бейбіт аспан үшін шүкіршілік ету», – дейді Күлән Қапезқызы.
Оның референдумға қатысуы азаматтық белсенділік жасқа қарамайтынын көрсететін жарқын мысал. Күлән апайдың айтуынша, отбасы мен елдегі бейбітшілік пен бірлік – ең үлкен байлық.
Күлән Алдамасова Солтүстік Қазақстан облысындағы Амангелді ауылында қарапайым шаруа отбасында дүниеге келген. Оның балалық шағы Ұлы Отан соғысы жылдарына тұспа-тұс келді. Алты жасынан бастап ол анасына шаруашылықта көмектесіп, бидай егіп, картоп отырғызып, үй жануарларын бағып-күткен. Бүгінде зейнеткер кіші ұлы Болат пен келіні Татьянамен бірге бір шаңырақ астында өмір сүріп, жақындарының қамқорлығы мен ықыласына бөленіп отыр.
