Атырау қаласында «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері еңбек ұжымдарымен кездесіп, жаңа Конституция жобасының негізгі ережелерін талқылады. Ашық диалог барысында еңбек адамының мәртебесін арттыру, әлеуметтік кепілдіктерді күшейту, сондай-ақ білім мен ғылымды мемлекеттің стратегиялық басымдығы ретінде бекіту мәселелері жан-жақты түсіндірілді.
«Атырау мұнай өңдеу зауыты» ЖШС өндірістік алаңында экономикалық тұрақтылық пен жұмысшы мамандықтарының мәртебесі сөз болды. Жылына 5,5 млн тоннаға дейін мұнай өңдейтін және 2500-ден астам қызметкерді біріктірген стратегиялық маңызы бар кәсіпорында жұмысшылар еңбек адамын қолдауға қатысты конституциялық басымдықтар жөнінде сұрақтарын қойды. Мәжіліс депутаты, Жалпыұлттық коалиция мүшесі Дүйсенбай Тұрғанов реформаның басты мәні – ұзақмерзімді әлеуметтік кепілдіктер жүйесін қалыптастыру екенін атап өтті.
«Адам еңбегі – мемлекеттің негізі. Жаңа Конституцияда адам, оның өмірі мен құқығы ең жоғары құндылық ретінде танылды. Еңбек ету құқығы, әділ еңбекақы және кемсітушілікке жол бермеу конституциялық деңгейде бекітіледі. Бұл өндіріс саласындағы мемлекеттік саясат, ең алдымен адамның мүддесіне бағытталатынын білдіреді», – деді ол.
Х. Досмұхамедов атындағы Атырау университеті оқытушылары және студенттерімен өткен кездесуде адам капиталын дамыту, ғылым мен инновацияны қолдау, цифрлық құқық пен зияткерлік еңбекті қорғау мәселелері көтерілді. Коалиция өкілі Берікқали Сәрсенғалиев Конституцияның 3-бабында білім мен ғылымды дамыту мемлекеттік саясаттың стратегиялық бағыты ретінде айқындалғанын жеткізді.
«Бұл – білім саласына бөлінетін қаржыны арттыруға, ғылыми зерттеулерге қолдау көрсетуді күшейтуге және жастардың зияткерлік әлеуетін жүйелі түрде дамытуға бағытталған нақты қадамдар. Прогресс пен білім құндылықтары жоғары құқықтық деңгейде қорғалады. Мемлекет дарынды жастарға инвестиция салуды жүйелі саясатқа айналдырады», – деді ол.
Саламат Мұқашев атындағы Атырау политехникалық жоғары колледжі ұжымымен өткен кездесуде педагогтердің құқықтық қорғалуы, кәсіби еркіндігі және бірыңғай білім беру стандарттарының маңызы талқыланды. Коалиция мүшесі Ақылбек Құлбараков әлеуметтік кепілдіктерді Конституция деңгейінде бекіту педагогтердің мәртебесін нығайтуға ықпал ететінін айтты.
«Мемлекет белгілейтін бірыңғай білім беру стандарттары педагогикалық қызметтің айқын әрі әділ қағидаттарын қалыптастырады. Бұл мұғалімдерді шамадан тыс жүктемеден, негізсіз талап пен әкімшілік қысымнан қорғауға мүмкіндік береді. Конституциялық кепілдіктер кәсіби еркіндік пен тең жағдайды қамтамасыз етеді», – деді коалиция өкілі.
Атырау Су Арнасы КМК ұжымымен кездесуде еңбек қауіпсіздігі, ең төменгі жалақы, зейнетақымен қамсыздандыру және әлеуметтік қорғау мәселелері қаралды. Коалиция мүшесі Қаршыға Жауымбаев конституциялық өзгерістердің әлеуметтік бағытына тоқталды.
«Еңбек қауіпсіздігі – қызметкердің жеке жауапкершілігі емес, мемлекеттің міндеті. Конституция санитарлық-гигиеналық талаптарға сай қауіпсіз еңбек жағдайларын қамтамасыз етуге кепілдік береді. Егер азамат адал еңбек етіп, өмірлік қиын жағдайға тап болса, мемлекет оны қорғауға және қолдауға міндетті. Бұл – әлеуметтік тұрақтылықтың берік негізі», – деді ол.
Кездесулер ашық пікір алмасу форматында өтті. Қатысушылар өз ұсыныстарын білдіріп, нақты сұрақтарын жолдады. Пікірталас алаңы жаңа Конституция жобасының мазмұнын жан-жақты түсіндіруге және еңбек ұжымдарының ұсыныстарын ескеруге мүмкіндік берді.
Атырауда өткен кездесулер жаңа Конституция жобасының әлеуметтік бағдарын айқын көрсетті. Еңбек адамының құқығы мен қауіпсіздігін күшейту, білім мен ғылымды ұлттық дамудың стратегиялық тірегіне айналдыру, әлеуметтік кепілдіктерді нақты әрі міндетті нормалармен бекіту – мұның бәрі мемлекеттің азаматтар алдындағы жауапкершілігін арттыруға бағытталған қадамдар. Кездесулер барысында қоғамның түрлі саласын қамтитын конституциялық өзгерістердің маңызы кеңінен түсіндіріліп, еңбек ұжымдарының ұсыныстары назарға алынды.
