«Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері сапары аясында Батыс Қазақстан облысына барып, өңірдегі еңбек ұжымдарымен және тұрғындармен бірқатар кездесу өткізді. Кездесулердің негізгі тақырыбы жаңа Конституция жобасының негізгі ережелері және елдің қоғамдық-саяси және әлеуметтік-экономикалық дамуы үшін стратегиялық маңызы болды.
Алғашқы жиын Теректі ауданындағы «Пойма май комбинаты» ЖШС алаңында өтті. Іс-шараға коалиция мүшелері мен кәсіпорын қызметкерлері қатысты. Кездесуде еңбек адамының мүддесін қорғау және жұмысшы еңбегі мемлекеттің негізі ретінде жаңа Конституцияда айқындалғаны туралы облыстық мәслихат депутаты, коалиция мүшесі Сержан Идиятов айтты.
«Конституцияда мынадай қағида бекітілген: егер адам адал еңбек етсе және қиын өмірлік жағдайға тап болса, мемлекет оған қорғаныс болуға және қолдау көрсетуге міндетті. Мемлекет қоғамдағы тұрақтылықты сақтап, азаматтарды әлеуметтік тұрғыдан қорғау міндетін өз жауапкершілігіне алады. Бұл жүктемені отбасыға не еңбеккердің өзіне ысыра салуға жол берілмейді», - деді ол.
Коалиция мүшелері әрі қарай автомобиль жолдарының құрылысымен айналысатын «Адал арна» ЖШС қызметкерлерімен кездесуге барды. Талқылау барысында әлеуметтік жауапкершілік, азаматтардың шешім қабылдау үдерісіне қатысуы және жаңа Ата Заңның құндылықтық бағдарлары сөз болды. Коалиция мүшесі Яна Лукпанова Конституция жобасындағы адамға бағдарланған даму моделінің маңызын атап өтті.
«Енді еңбек құқығы, лайықты жалақы және жұмыс орнында кемсітушілікке жол берілмеуі Конституциямен қорғалады. Бұл мемлекеттік саясат еңбек адамының құқығы мен мүддесін басшылыққа алатынын білдіреді. Сол арқылы жұмысшының жалақысы, еңбек жағдайы, жұмыс берушімен қарым-қатынасы айқын құқықтық негізге ие болады. Жеке және ұжымдық еңбек дауларын қозғау құқығы да конституциялық деңгейде бекітілді», – деді ол.
Әрі қарай сапар Бөрлі ауданындағы мәдениет үйінде жалғасты. Тұрғындармен өткен кездесуде қалалық мәслихат депутаты, коалиция мүшесі Жаслан Ешмұханбетов Конституция жобасы қоғамдық келісімді жаңарту сұранысын көрсететінін атап өтті.
«Жаңа Конституция мәтінінің басты ерекшелігі – адам құқығына бағдарлануы. Адамның құқығы мен бостандығы Преамбулада ғана емес, Конституцияның тұтас мағыналық өзегі мен басым бағыты ретінде айқындалады», – деді коалиция мүшесі.
Сапар «Конденсат» АҚ мұнай өңдеу өнімдерін шығаратын кәсіпорын ұжымымен кездесумен қорытындыланды. Өңірлік коалиция мүшесі Әліби Сүндетов халықтық Конституцияда еңбек құқық және құндылық ретінде, ал жұмысшылардың әлеуметтік қорғалуы мемлекеттің міндеті ретінде бекітілгенін айтты.
«Құжатқа сәйкес әр адам еңбек ету, кәсібін және мамандығын таңдау құқығына ие. Бұл ереже еңбектің еріктілік принципін бекітіп, кез келген мәжбүрлеу формаларын жоққа шығарады және азаматтарға кәсіби жолын өздігінен анықтау мүмкіндігін береді. Сондай-ақ қауіпсіздік талаптарына сай еңбек жағдайының қамтамасыз етілу құқығы кепілдендірілді. Бұл жұмыс беруші мен мемлекетке өндірістік жарақаттарды азайту және жұмысшылардың денсаулығын сақтау міндетін жүктейді», – деді ол.
Кездесулер қорытындысы бойынша қатысушылар Конституцияның нақты ережелерін талқылап, өз сұрақтарын қойып, ұсыныстарын жеткізді. Диалог алаңдары тұрғындардың ұсынылған өзгерістерге жоғары қызығушылығын және Конституция жобасының негізгі ережелерін талқылаудың мазмұнды сипатын көрсетті.
