Шымкент қаласында алдағы референдум қарсаңында ақпараттық-түсіндіру жұмыстары жалғасып жатыр. Осы мақсатта «Әділетті және Прогрессивті Қазақстанның Халықтық Конституциясы үшін!» қалалық коалиция мүшелері «City School» мектебінің ұжымымен кездесу өткізді.
Жиынның негізгі мақсаты – Конституцияның жаңа жобасына енгізілген өзгерістер мен толықтыруларды таныстырып, референдумның қоғам үшін маңызын түсіндіру болды.
Кездесуге «AMANAT» партиясы Шымкент қалалық филиалы Партиялық бақылау комиссиясының төрағасы Ғани Ташқараев, мәслихат депутаттары, фракция мүшелері Лазиз Сулайманов және Алия Юсупова, сондай-ақ Қаратау аудандық партия филиалының атқарушы хатшысы Данияр Омаров қатысты.
Жиын барысында коалиция мүшелері ұсынылып отырған конституциялық өзгерістердің мазмұнына тоқталып, олардың мемлекеттік басқару жүйесін жетілдіруге, азаматтардың құқықтары мен бостандықтарын қорғауды күшейтуге және қоғамдағы әділеттілік қағидаттарын нығайтуға бағытталғанын атап өтті.
Лазиз Сулайманов өз сөзінде референдумның тарихи маңызын атап өтті.
«Конституция – мемлекет дамуының негізгі бағдары. Ұсынылып отырған өзгерістер елдің тұрақты дамуына және басқару жүйесінің тиімділігіне ықпал етеді. Сондықтан әр азамат референдумға қатысып, өз көзқарасын білдіруі маңызды», – деді ол.
Ал Алия Юсупова қоғамдағы белсенді азаматтық ұстанымның маңызын ерекше атап өтті.
«Еліміздің болашағы әрқайсымыздың таңдауымызға байланысты. Референдум – халықтың пікірін білдіретін маңызды мүмкіндік. Сондықтан мұндай шешімдерге жауапкершілікпен қарауымыз қажет», – деді ол.
Кездесу барысында мектеп ұжымы өз пікірлерін білдіріп, көкейлеріндегі сұрақтарын қойды. Ашық форматта өткен жиында қатысушылар референдумның маңызын түсініп, саяси науқанға белсенді қатысу қажеттігін атап өтті.
