Конституциялық өзгерістер мен алдағы республикалық референдум бойынша ақпараттық-түсіндіру жұмыстары аясында Коалиция жетекшісі Н.С. Кобжанов, «Respublica» және «BAYTAQ» партиялары филиалдарының төрағалары Н.Е. Әубәкіров пен С.-М.Т. Казитов, сондай-ақ облыстық мәслихаттың «Ауыл» партиясынан депутаты С. Шаймағанбет Қазақстанда жоғары сапалы әк өндіретін жетекші кәсіпорын — «Saryopan Operating» ЖШС, сондай-ақ ашық тәсілмен тас көмір өндіруді жүзеге асыратын «Қазақмыс Коал» ЖШС еңбек ұжымдарымен кездесулер өткізді.
Кездесулер вахталық ауысымда еңбек ететін қызметкерлермен тікелей өндірістік учаскелерде өтті. Диалог барысында жаңа Конституция жобасының негізгі ережелері түсіндіріліп, ұсынылып отырған өзгерістердің көздейтін мүмкіндіктері мен кепілдіктері таныстырылды.
Өз сөзінде Коалиция жетекшісі Н.С. Кобжанов жобаның басты идеясы «мемлекет – адам үшін» қағидатына негізделгенін атап өтті. Бұл қағидат азаматтардың құқықтары мен бостандықтарын нығайтуды, қоғамдық қатысу тетіктерін кеңейтуді және мемлекеттік басқарудың неғұрлым теңгерімді моделін қалыптастыруды көздейді.
Нұрлан Әубәкіров өңірлердің дербестігін кеңейту мен қабылданатын шешімдердің ашықтығы инвестициялар мен кәсіпкерліктің дамуына қолайлы жағдай жасайтынын атап өтті. Ол инновациялық дамудың маңыздылығын айта отырып, Қытай Халық Республикасының Шэньчжэнь қаласының тәжірибесін мысалға келтірді.
Сұлтан Шаймағанбет жастардың қоғамдық-саяси өмірге қатысу мүмкіндіктерін кеңейту мәселесіне тоқталса, Сейфул-Мәлік Казитов экологиялық басымдықтар мен тұрақты даму қағидаттарын конституциялық деңгейде бекітудің маңыздылығын атап өтті.
Кездесулер барысында кәсіпорын қызметкерлері өздерін қызықтырған сұрақтарын қойып, ұсынылып отырған өзгерістердің мазмұны бойынша тиісті түсіндірмелер алды.
Өңірлерде жаңа Конституция жобасының негізгі ережелерін түсіндіру жұмыстары жалғасуда.
