Қарағанды облысындағы Теміртау жоғары политехникалық колледжінде Конституциясы жобасын талқылауға арналған кездесу өтті. Іс-шара ұсынылып отырған өзгерістердің мазмұны мен олардың қоғамдық-саяси үдерістерге ықпалын түсінуге мүдделі студенттер мен оқытушылардың басын қосты.
Кездесуге «AMANAT» партиясы жанындағы «Жастар Рухы» жастар қанаты» қоғамдық бірлестігінің Қарағанды облыстық филиалының жетекшісі Арафат Мәжитов, партияның аудандық филиалының төрағасы Нұржан Әжіков, Теміртау қалалық мәслихатының депутаты Нұрлыхан Қалқаман, «Қазақмыс корпорациясы» ЖШС «Kemel Keleshek» жастар ұйымы» ҚБ төрағасының орынбасары, «Талдау мектебі Қарағанды» түлегі Арман Бейсекеев қатысты. Сөз сөйлегендер конституциялық нормалардың мемлекеттің құқықтық негізін қалыптастыратынын, билік пен қоғам арасындағы өзара іс-қимыл қағидаттарын айқындайтынын, азаматтардың құқықтары мен міндеттерінің теңгерімін бекітетінін атап өтті.
Нұрлыхан Қалқаман: «Конституция – ел дамуының бағытын айқындайтын және қоғамдық келісім қағидаттарын бекітетін стратегиялық негіз», – деп атап өтті. Сондай-ақ жоба ережелерін жастарға түсінікті әрі мазмұнды түрде жеткізудің маңыздылығына ерекше назар аударылды.
Арафат Мәжитов, өзгерістердің жастар үшін маңыздылығына тоқталды. «Бүгінгі жастар жаңа қағидалар мен институттар жағдайында өмір сүріп, дамитын болады. Сондықтан олардың мәнін терең түсіну айрықша маңызды», – деп атап өтті. Іс-шараға барлығы 150-ге жуық студент қатысты.
Кездесу барысында қатысушыларға Конституция жобасының негізгі ережелері және олардың қоғамдық келісімді нығайтуға, халық бірлігін сақтауға әрі мемлекеттің орнықты дамуын қамтамасыз етуге бағытталған маңызы жан-жақты түсіндірілді. Талқылау ұсынылатын өзгерістердің мазмұнына, стратегиялық мақсаттарына және олардың азаматтардың күнделікті өміріне ықпалына арналды.
«Қатысу мәдениетін қалыптастыру ақпараттанудан, ашық талқылаудан және жүзеге асырылып жатқан өзгерістерге жауапкершілікпен қараудан басталады», – деп атап өтті Арман Бейсекеев.
Студенттер жоғары белсенділік танытып, Негізгі заңның рөлі мен жүргізіліп жатқан реформалардың маңызына қатысты өз ұстанымдарын білдірді. Диалог аясында өзгерістерді іске асыру тетіктері, мемлекеттік органдардың қоғам алдындағы жауапкершілігін арттыру, сондай-ақ азаматтардың қоғамдық талқылауларға қатысу мүмкіндіктерін кеңейту мәселелері қозғалды. Қатысушылар ашық форматтың мазмұнды әрі сындарлы пікір алмасуға ықпал ететінін атап өтті.
Талқылау қорытындысы бойынша азаматтық жауапкершілік қоғамдағы жаңғыру үдерістеріне саналы қызығушылық танытудан және олардың мәнін терең түсінуден басталатыны айтылды. Осындай диалог алаңдары сенімді нығайтудың, кемел азаматтық ұстаным қалыптастырудың және жастарды қоғамдық күн тәртібіне белсенді тартудың тиімді құралы ретінде бағаланды.
