Маңғыстау облысы Жаңаөзен қаласында Жалпыұлттық коалиция мүшелері өндіріс, әлеуметтік және мәдениет салалары ұжымдарымен, сондай-ақ жастар ұйымдарының көшбасшыларымен бірқатар кездесу өткізді. Ашық диалог барысында жаңа Конституция жобасының құрылымы, Преамбуланың мәні және адам құқықтарын қорғауға бағытталған негізгі нормалар кеңінен түсіндірілді.
Сапар аясында коалиция өкілдері алдымен «КаскорМашзавод» ЖШС еңбек ұжымымен жүздесті. Мұнай-газ секторы үшін өндірістік жабдықтар шығаратын ірі машина жасау кәсіпорнында жаңа Конституциядағы еңбек адамына қатысты кепілдіктер талқыланды. Спикерлер Преамбулада алғаш рет адам құқығы мен бостандығы мемлекеттің негізгі басымдығы ретінде айқындалғанын атап өтті.
Маңғыстау облыстық мәслихатының депутаты, коалиция мүшесі Аят Сүгірбай еңбек адамының мәртебесін арттыру – конституциялық реформаның өзегі екенін айтты.
«Жаңа Конституция жобасында адам құқығын қорғау және азаматтардың әлеуметтік әл-ауқатын арттыру мемлекеттің міндеті екені айқын бекітілді. Еңбек қауіпсіздігі, әділ еңбекақы, әлеуметтік қолдау шаралары конституциялық кепілдік деңгейіне көтерілді. Бұл – өндірістегі әрбір азаматтың құқығы заңмен қорғалады деген сөз», – деді депутат.
Коалицияның сапары Жаңаөзен қаласы маңындағы Тоқмақ жерінде орналасқан су тұщыту зауытында жалғасты. Жиында коалиция өкілі Асқар Ноғаев жұмысшыларға жаңа Конституция жобасының халықтық сипатына тоқталды. Оның айтуынша, құжатты әзірлеу барысында Конституциялық комиссияның жұмысы ашық жүргізіліп, олардың жұмысы интернет-ресурстар мен әлеуметтік желілерде жарияланды және халықпен бірге талқыланды.
Өз кезегінде коалиция мүшесі Анар Шамшадинова жаңа Преамбуланың мазмұнына ерекше мән берді.
«Преамбулада адам құқығы мен бостандығы мемлекеттің ең жоғары құндылығы ретінде айқындалды. Бұл – билік пен қоғам арасындағы қарым-қатынастың жаңа философиясы. Ендігі жерде кез келген мемлекеттік шешімнің өлшемі – адам мүддесі», – деді ол.
Жиында сөз сөйлеген қалалық мәслихат депутаттары, коалиция мүшелері Орынбасар Сейдов пен Арғынбек Қалбаев осы пікірді жалғастырып, жаңа Конституцияның негізгі ерекшеліктерінің бірі – әлеуметтік мемлекет қағидатын нақты нормалармен бекіту екенін атап өтті.
Сонымен қатар коалиция мүшелері мәдениет саласының өкілдерімен кездесті. Жиында шығармашылық еркіндік, ұлттық мәдениетті қолдау және тарихи-мәдени мұраны сақтау мәселелері талқыланды. Коалиция өкілі Киікбай Жаулин алдағы қоғамдық-саяси жаңару кезеңінде мәдениет пен руханияттың рөлі арта түсетінін айтты.
«Конституцияның жаңа жобасында азаматтардың шығармашылық әлеуетін дамытуға құқықтық негіз қаланады. Ұлттық мәдениетті қолдау мен тарихи мұраны сақтау қағидаттары конституциялық деңгейде бекітіледі. Бұл – рухани жаңғырудың берік құқықтық тірегі», – деді ол.
Коалиция мүшелерінің жаңаөзендік жастармен кездесуі де мазмұнды өтті. Жастар білім, жұмыспен қамту және әлеуметтік қолдау мәселелерін көтерді. Спикерлер жаңа Конституцияда жастардың сапалы білім алуға, денсаулығын қорғауға, кәсіппен айналысуға және еңбек нарығында тең мүмкіндікке ие болуына кепілдіктер қарастырылғанын жеткізді.
«Жаңа Конституцияға сәйкес, еліміздің дамуы табиғи ресурстарға ғана емес, адам капиталына және олардың жетістіктеріне байланысты болады. Білімді, бәсекеге қабілетті ұрпақ – мемлекеттің басты байлығы. Сондықтан адам әлеуетін дамыту – ұлттық саясаттың негізгі бағытына айналады», – деді коалиция өкілі Өмірбек Құрбанбаев.
Жаңаөзендіктер Жалпыұлттық коалиция өкілдерімен кездесуде жаңа Конституцияның мазмұны бойынша маңызды ақпараттармен танысты. Азаматтарға берілген мемлекеттік кепілдіктер, әлеуметтік қолдаулар, қоғамдық-саяси жүйедегі өзгерістер олардың еліміздің жарқын болашағына деген сенімін нығайтты.
Кездесулер барысында жаңаөзендіктер жаңа Конституция жобасының мазмұнымен кеңінен танысты. Азаматтардың құқығы мен әлеуметтік кепілдігін күшейтуге, еңбек қауіпсіздігін қамтамасыз етуге, шығармашылық пен жастар бастамаларын қолдауға бағытталған нормалар қатысушылар тарапынан қолдау тапты. Ашық форматтағы диалог тұрғындардың конституциялық өзгерістерге қатысты сұрақтарына нақты жауап беріп, ел болашағына деген сенімді нығайтты.
