Жалпыұлттық референдум қарсаңында өңірде жаңа Ата Заң жобасын түсіндіруге бағытталған кездесулер жалғасуда. Осы орайда «Әділетті және прогрессивті Қазақстанның халықтық Конституциясы үшін» жалпыұлттық коалициясы өңірлік филиалының мүшелері медицина саласының өкілдерімен жүздесті.
Кездесу «Мейірім» медициналық орталығында өтіп, жиынға коалиция мүшелері Исламбек Дастан мен Ұлбике Алтынбек қатысты. Басқосу барысында спикерлер жаңа Конституция жобасында ұсынылып отырған өзгерістер мен толықтырулардың негізгі бағыттарын түсіндіріп, оның қоғам мен мемлекет өміріндегі маңызына тоқталды.
Жиын барысында Конституция жобасының негізгі қағидаттары таныстырылып, онда азаматтардың құқықтары мен бостандықтарын қорғау, мемлекеттік басқару жүйесін жетілдіру, сондай-ақ елдің әлеуметтік-экономикалық дамуын қамтамасыз етуге бағытталған нормалар кеңінен сөз болды. Сонымен қатар мемлекет пен қоғам арасындағы өзара жауапкершілік қағидаларына ерекше мән берілгені атап өтілді.
Коалиция мүшесі Исламбек Дастанның айтуынша, жаңа Конституция жобасы қоғамның сұранысына сай әзірленген маңызды құжат.
«Конституция – кез келген мемлекеттің даму бағытын айқындайтын негізгі құқықтық құжат. Ұсынылып отырған жаңа жобада азаматтардың құқықтарын қорғау, әлеуметтік әділдікті нығайту, мемлекеттік басқарудың тиімділігін арттыру мәселелері басты назарға алынған. Бұл өзгерістер еліміздің тұрақты дамуына және қоғамдағы сенімді нығайтуға ықпал етеді. Сондықтан әрбір азамат алдағы референдумға қатысып, ел болашағына қатысты маңызды шешім қабылдауға өз үлесін қосуы қажет», – деді Исламбек Дастан.
Ал, Ұлбике Алтынбек өз сөзінде референдумның ел өміріндегі тарихи маңызын атап өтті.
«Жаңа Конституция жобасы мемлекет пен қоғам арасындағы байланысты жаңа деңгейге көтеруді көздейді. Құжатта халықтың әл-ауқатын арттыруға, заң үстемдігін қамтамасыз етуге және азаматтардың мемлекеттік шешімдер қабылдау үдерісіне қатысу мүмкіндігін кеңейтуге бағытталған нормалар қамтылған. Бұл – еліміздің саяси және әлеуметтік жаңғыруына жол ашатын маңызды қадам. Сондықтан референдумға қатысу – әр азаматтың азаматтық жауапкершілігін көрсететін маңызды саяси таңдау», – деді Ұлбике Алтынбек.
Кездесу барысында медициналық орталық қызметкерлері ұсынылып отырған өзгерістерге қатысты өз сауалдарын қойып, ой-пікірлерін білдірді. Спикерлер тарапынан барлық сұрақтарға жауап беріліп, алдағы референдумның маңызы кеңінен түсіндірілді.
