А.Байтұрсынұлы атындағы Қостанай өңірлік университетінің студенттерімен облыстық коалиция мүшелері Сейітбек Қуанышбаев, Гүлмира Капенова және Даурен Рахаделов кездесу өткізді. Оның негізгі тақырыбы жаңа Конституция жобасының негізгі ережелері мен алдағы референдумның ел болашағы үшін маңызы болды.
Іс-шара студент жастармен ашық диалог форматында ұйымдастырылды. Кездесу барысында қатысушылар ұсынылып отырған конституциялық өзгерістер туралы кеңінен айтып, реформалардың азаматтардың, әсіресе жастардың өміріне қалай әсер етуі мүмкін екені жөнінде студенттердің сұрақтарына жауап берді.
Студенттерді негізгі заңды реформалаудың себептері мен жаңартылған Конституцияда қарастырылған өзгерістер қызықтырды. Бұл сұрақтарға жауап бере отырып, Сеитбек Қуанышбаев Конституция бүкіл мемлекеттік жүйенің негізі екенін және мемлекеттің жұмыс істеуінің басты қағидаларын айқындайтынын атап өтті.
Оның айтуынша, қолданыстағы Конституция 1995 жылы қабылданған және осы уақыт ішінде ел мен әлем айтарлықтай өзгерген.
«Конституция – бұл жай ғана заң емес. Бұл мемлекеттік шешімдердің қабылдану тәртібін, билік институттары арасындағы өкілеттіктердің бөлінуін және азаматтардың құқықтары мен бостандықтарының кепілдіктерін айқындайтын негізгі құжат. Соңғы 30 жыл ішінде әлемде де, елімізде де үлкен өзгерістер болды: халықаралық бәсекелестік күшейді, геосаяси жағдай күрделене түсті, жаңа экономикалық және саяси сын-қатерлер пайда болды», – деді ол.
Кездесу барысында Гүлмира Капенова да өз пікірін білдірді. Ол жаңа Конституция жобасында қоғамның құндылықтар жүйесін нығайтуға ерекше назар аударылғанын атап өтті.
Оның айтуынша, маңызды бағыттардың бірі – отбасы институтын қолдау.
«Құндылықтар жүйесі жаңарып, кеңейіп жатыр деуге болады. Жаңа Конституцияда отбасылық құндылықтарға ерекше назар аударылған. Онда неке мен отбасы — ер мен әйелдің тең құқықты және ерікті одағы екені нақты көрсетілген. Сонымен қатар, ана болу, әке болу және балалық шақ мемлекет қорғауында болады», – деді ол.
Кездесу барысында студенттер талқылауға белсенді қатысып, сұрақтар қойып, өз пікірлерімен бөлісті. Ұйымдастырушылар мұндай кездесулер жастарға елде болып жатқан үдерістерді тереңірек түсінуге және өздерінің ел болашағындағы рөлін сезінуге мүмкіндік беретінін атап өтті.
