Шымкент қаласында «Әділетті және Прогрессивті Қазақстанның Халықтық Конституциясы үшін!» коалициясының мүшелері қала тұрғындарымен ашық форматта экспромт-кездесу өткізді. Іс-шара шаһардағы ірі сауда орталықтарының бірінде ұйымдастырылып, келушілерге жаңа Конституция жобасының мазмұны мен маңызын түсіндіруге арналды.
Кездесуге ҚР Парламенті Сенатының депутаты Айгүл Қапбарова, «AMANAT» партиясы Шымкент қалалық филиалы атқарушы хатшысының орынбасары Ербол Байқонысов, Шымкент қаласы кәсіподақтар орталығының төрағасы Бауыржан Алтеев, қалалық мәслихат депутаты Қайрат Имашев, Тұран аудандық партия филиалының атқарушы хатшысы Есімхан Бертаев, «Ауыл» партиясының төрағасы Ғани Қарабеков, «AMANAT» партиясының белсендісі Икрам Хашимжанов және Шымкент қаласы денсаулық сақтау басқармасына қарасты «Мамандандырылған бөбектер үйі» МКК бас дәрігері Ғалымжан Айнабек қатысты.
Жұмысшы топ өкілдері сауда орталығына келген азаматтармен еркін форматта пікір алмасып, Конституцияның жаңа жобасында қарастырылған негізгі өзгерістер мен толықтыруларға тоқталды. Кездесу барысында тұрғындар өз сұрақтарын қойып, ұсыныс-пікірлерін білдіруге мүмкіндік алды.
Сенат депутаты Айгүл Қапбарова өз сөзінде Жаңа Конституция жобасының басты мақсаты – әділетті қоғам қалыптастыру екенін атап өтті. Оның айтуынша, ұсынылып отырған өзгерістер азаматтардың құқықтарын қорғауды күшейтіп, билік тармақтарының жауапкершілігін арттыруға бағытталған.
«Бұл – тек заңнамалық құжат емес, елдің болашағын айқындайтын маңызды қадам. Сондықтан әрбір азамат референдумға қатысып, өз таңдауын жасауы қажет», – деді ол.
Ал Ербол Байқонысов Конституциялық өзгерістердің халықтың сұранысына негізделгенін жеткізді.
«Бүгін біз тұрғындармен тікелей жүздесіп, олардың пікірін тыңдап отырмыз. Референдум – әр азаматтың ел тағдырына араласуына мүмкіндік беретін тарихи сәт. Саналы таңдау жасау үшін ең алдымен толық ақпарат алу маңызды», – деп атап өтті ол.
Іс-шара барысында тұрғындарға ақпараттық материалдар таратылып, алдағы референдумның маңызы кеңінен түсіндірілді. Ашық әрі еркін форматта өткен кездесу азаматтардың саяси үдерістерге белсенді қатысуына серпін берді.
Ұйымдастырушылардың айтуынша, мұндай кездесулер алдағы уақытта да жалғасын тауып, тұрғындармен тікелей байланыс орнату арқылы түсіндіру жұмыстары жүйелі түрде жүргізіледі.
