Ақтөбе облыстық көпсалалы ауруханасында Конституцияның жаңа жобасындағы өзгерістер түсіндірілді. Медициналық орталық ұжымымен кездесуге келген өңірлік коалиция мүшелері Ата заңның жаңа редакциясындағы адам құқығы мен бостандықтары, азаматтардың денсаулығын сақтау мен медициналық көмек алу құқығы, медицина қызметкерлерінің қауіпсіздігі, т.б. өзгерістерге тоқталды.
Облыстық мәслихат депутаты Қайрат Сабыр жаңа жобадағы медицина саласына қатысты өзгерістер денсаулық сақтау жүйесінің тиімді жұмыс істеуіне құқықтық негіз қалыптастырып, ел тұрғындарының сапалы дәрігерлік қызметке қолжетімділігін арттыратынына тоқталды. Жаңа жобаның стратегиялық басымдығы ретінде адами капиталды дамыту белгіленгенін, мемлекеттің ұзақ мерзімді дамуының негізгі бағыттары ретінде білім беру, ғылым, мәдениет және инновациялық шешімдер айқындалғанын айтты.
«Жаңа Конституция жобасының басты ерекшеліктерінің бірі – адам және адами капитал мәселесіне ерекше басымдық берілуі. Жаңа Конституцияның өзегінде адам, оның қадір-қасиеті, қауіпсіздігі, әлеуметтік қорғалуы және дамуы тұр. Адами капиталды дамыту — білім беру, денсаулық сақтау, еңбек құқықтары, әлеуметтік кепілдіктер секілді бағыттармен тығыз байланысты. Мемлекет үшін ең басты құндылық адам екені конституциялық деңгейде күшейтіліп отыр. Сондықтан бұл өзгерістер әр азаматтың мүддесіне тікелей қатысты деп есептеймін», – деді депутат Қайрат Сабыр.
М.Оспанов атындағы Батыс Қазақстан медицина университетінің ректоры Талғар Әбілов Конституцияның жаңа жобасындағы азаматтардың құқықтары мен бостандықтары, қоғам өмірінің әлеуметтік және құқықтық негізін қалыптастыру, дәрігерлердің қауіпсіздігі, тіл мәртебесі, т.б. мәселелерге тоқталды.
«Жаңа құжатта адами капиталға – білім мен ғылымға басымдық беріліп отыр. Бұл экономиканың әрі қарай дамуына жол ашады. Сонымен қатар халықтың денсаулығы, әр азаматтың заңда белгіленген көлемде сапалы медициналық көмекті алу мәселелері туралы да нақты баптарда айтылған», – деді ол.
Жиында сөз сөйлеген аурухана басшысы Қайрат Жетібаев, сала ардагері Жексенбі Көптілеуовтер де пікірлерін білдіріп, ұжымды 15 наурызда болатын референдумға белсенді қатысуға шақырды.
