Астанада Polytech Astana ЖШС ұжымымен ұсынылып отырған Конституциялық реформаларды түсіндіруге арналған кездесу өтті.
Іс-шара барысында қызметкерлермен елдегі саяси жаңғырудың негізгі бағыттары, заң үстемдігін нығайту және азаматтардың құқықтарын қорғау мәселелері талқыланды.
Кездесуге Астана қаласы мәслихатының депутаты Бауыржан Қасымбергебаев және Қазақстан Халық партиясы Орталық аппаратының талдау және халықаралық байланыстар бөлімінің басшысы Сұлтанбек Құдабайұлы қатысты.
Спикерлер өз сөздерінде ұсынылып отырған конституциялық өзгерістер елдегі демократиялық институттарды дамытуға, қоғам мен мемлекет арасындағы өзара жауапкершілікті күшейтуге бағытталғанын атап өтті.
Бауыржан Қасымбергебаев еңбек ұжымдарымен ашық диалог жүргізудің маңыздылығына тоқталып, азаматтардың пікірін тыңдау мен түсіндіру жұмыстары қоғамдағы құқықтық мәдениетті нығайтуға ықпал ететінін айтты.
Ал Сұлтанбек Құдабайұлы Конституциялық реформалардың негізгі бағыттарын түсіндіріп, олардың елдің әлеуметтік-экономикалық және саяси дамуына оң әсер ететінін жеткізді.
Кездесу барысында кәсіпорын қызметкерлері өз сұрақтарын қойып, ұсынылған өзгерістер жөнінде пікір алмасты. Іс-шара ашық диалог форматында өтіп, қатысушылар үшін мазмұнды талқылау алаңына айналды.
