«Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының өкілдері Түркістан облысының Қазығұрт ауданында бірқатар маңызды кездесулер өткізді. Өңіріміздің ауыл шаруашылығы саласында өзіндік орны бар ірі кәсіпорындардың бірі – «Сапа-2002» ЖШС-нің өндірістік базасында жұмысшылармен кездесу өтіп, жалпыұлттық бірегейлікті нығайту, мемлекеттік басқарудың тиімділігін арттыру, экономиканы дәйекті түрде дамыту мәселелерінде конституциялық реформалардың маңызы айтылды.
Жаңа Конституция нормаларын түсіндіруге арналған жиынға Түркістан облыстық мәслихатындағы фракция жетекшісі Алтынсары Үмбетәлиев, Түркістан облыстық мәслихатының депутаты Нұржан Аширов, Қарабұлақ аудандық ауруханысының бас дәрігері Дәулет Мұсаев, Қазығұрт аудандық мәслихатының төрағасы Тайбек Қалымбетов, Қазығұрт аудандық мәслихатының депутаты Есімхан Исақұлов, ауыл ақсақалы Аблахан Жылқыбаев қатысты. Басқосуда Қазақстан халқының 40 пайызы ауылда тұратыны айтылды. Ауыл шаруашылығы бүкіл елдің, әсіресе, ауыл тұрғындарының тұрмыс сапасына тікелей әсер ететін маңызды сала екеніне назар аударылды. Сол себепті ауылды өркендету ісіне мемлекеттік деңгейде айрықша мән беріліп, Қазақстан бүгінгіден де қуатты елге айналуы және алға өркенді қадам басуы үшін әр азаматтың құқықтарын, заңды мүдделерін және азаматтық жауапкершілігін Конституцияда бекітудің маңызы айтылды.
Жұмысшылармен кездесуге қатысқан Түркістан облыстық мәслихатындағы фракция жетекшісі Алтынсары Үмбетәлиев әділетті, құқықтық және адамға бағдарланған мемлекет құру – Мемлекет басшысы Қасым-Жомарт Кемелұлы Тоқаев қолға алған саяси реформалардың басты мақсаты екенін айтты.
«Жаңа Конституцияның басты ерекшелігі – адам құқықтары мен бостандықтарына басымдық беруінде болып отыр. Негізгі заңда адам, оның өмірі, құқықтары мен қадір-қасиеті мемлекеттің ең жоғары құндылығы ретінде айқындалған. Конституцияның 1-бабында көрсетілген Қазақстан Республикасының әлеуметтік мемлекет болып танылуы, ең алдымен, адам құқықтарын сақтаумен ерекшеленеді. Азаматтардың заңды мүддесі мен құқықтарының конституциялық деңгейде бекітілуі – Әділетті қоғамды қалыптастыруға серпін беріп, Заң мен тәртіп қағидатын орнықтыра түседі деген сенімдеміз», - деді Алтынсары Дүйсенбекұлы.
Адал еңбекке жағдай жасау, еңбек адамына құрмет көрсету – Конституцияның идеологиялық мазмұны екенін Қазығұрт аудандық мәслихатының төрағасы Тайбек Талымбетов айтты.
«Жаңа Ата заң – еліміздің орнықты дамуының, қоғамдық тұрақтылық пен құқықтық тәртіптің берік кепілі. Азаматтардың қауіпсіз еңбек жағдайымен қамтылуы, жұмысшыларға берілетін әлеуметтік кепілдіктер конституциялық деңгейде бекітіліп отыр. Бұл нормалар, әсіресе, өндіріс саласында еңбек ететін азаматтар үшін ерекше маңызды деп білеміз», – деді ол.
Жұмысшылар жаңа Конституцияны уақыт талабынан туындаған маңызды қадам деп бағалап, оны қолдайтындарын ашық айтты. Олар алдағы референдумда өз таңдауын жасап, ел болашағына бейжай қарамайтын азаматтық ұстаным танытатындарын жеткізді.
