Маңғыстау облысы Түпқараған ауданында «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері тұрғындармен кездесіп, жаңа Ата Заң жобасын талқылады. Кездесу барысында жаңа Конституцияда басымдық берілген адам құқығы, әлеуметтік әділдік, халықтың әл-ауқатын арттыру мәселелері талқыланды.
Жалпыұлттық коалиция мүшелерінің алғашқы кездесуі су тұщыту зауытының аумағында өтті. Тәулігіне 5000 текше метр теңіз суын тұщытатын зауыттың жұмысшыларымен өткен кездесуде коалиция мүшелері еңбек адамының қауіпсіз ортада, талапқа сай жағдайда еңбек ету құқығы туралы айтты.
Коалиция мүшесі Нури Тумышевтың айтуынша, еңбек қауіпсіздігін қамтамасыз ету – жеке адамның емес, мемлекеттің жүйелі міндеті.
«Жұмысшының өмірі мен денсаулығы ешқандай өндірістік жоспардан немесе экономикалық есептен төмен тұрмауы керек. Қауіпті ортада жұмыс істеуді «кәсіптің табиғаты солай» деп ақтап алуға болмайды. Өндірістегі кез келген тәуекелдің алдын алу – жұмыс беруші мен мемлекеттің ортақ жауапкершілігі. Еңбек адамы қауіпсіздік талаптарының орындалуын, қорғаныс құралдарының толық берілуін және адамға лайықты еңбек жағдайының жасалуын заңды түрде талап ете алады», – деді Нури Тумышев.
Әрі қарай коалиция мүшелерінің кездесуі М. Сеңгірбекұлы атындағы өнер мектебінде жалғасты. Өнер саласының қызметкерлері бас қосқан жиында мәдениет пен шығармашылық еркіндікке ерекше мән беріліп, нақты мемлекеттік міндеттер айқындалғаны айтылды.
«Мәдениет пен шығармашылық – ұлттың рухани тірегі. Өнер адамдары өз ойын еркін айтып, туындысын еш кедергісіз ұсына алуы тиіс. Сондықтан құжатта ең алдымен шығармашылық еркіндікке, ұлттық өнерді дамытуға, дәстүрлі мәдениетті қолдауға басымдық беріледі. Бұл – болашақ ұрпаққа төл құндылықтарымызды жеткізудің кепілі», - деді коалиция мүшесі Пания Сармурзина.
Бұдан бөлек ауыл-аймақтағы мәдени нысандарды дамыту, жас таланттарды қолдау және шығармашылық бастамаларды ынталандыру бағыттары бойынша мазмұнды пікір алмасу өтті.
Жаңа Ата Заң жобасында спорт саласын дамытуға айрықша мән берілген. Бұл туралы жалпыұлттық коалиция мүшелері Түпқараған аудандық балалар мен жасөспірімдер спорт мектебінде өткен кездесуде кеңінен түсіндірді. Коалиция өкілі Айнагүл Байбатырованың айтуынша, әр азаматтың спортпен шұғылдануына тең мүмкіндік жасалуы қажет.
«Жаңа Конституция жобасында бұқаралық спорттың дамуына ерекше көңіл бөлінген. Әрбір ауылда балалар мен жастарға қолжетімді спорт нысандары болуы керек. Сонымен қатар кәсіби спортшылардың құқығы мен әлеуметтік қорғалуы да ескерілген», – деді ол.
Сондай-ақ Жалпыұлттық коалиция мүшелері білім саласының қызметкерлерімен жүздесті. Жиында мұғалімдердің құқықтық және әлеуметтік қорғалуы, педагог мәртебесіне қатысты нормалар, инклюзивті білім беруді дамыту мәселесі сөз болды.
Коалиция мүшесі Жанна Джартыкованың айтуынша, педагогтердің кәсіби қызметіне негізсіз араласуға жол бермеу, абыройы мен беделін арттыру – конституциялық деңгейде айқындалған бағыттардың бірі.
«Мұғалім – жай ғана маман емес, ол – ұлттың болашағын тәрбиелеп отырған тұлға. Сондықтан педагогтың еңбегі әрдайым құрметке лайық. Жаңа Конституция жобасында мұғалімдердің құқықтық және әлеуметтік қорғалуына ерекше мән беріліп отыр. Бұл – олардың кәсіби қызметіне орынсыз араласуға жол бермеу, еңбегін әділ бағалау және қоғамдағы беделін арттыру деген сөз. Біз педагогтің мәртебесін тек сөз жүзінде емес, нақты нормалар арқылы күшейтуді көздеп отырмыз. Сонда ғана білім сапасы артып, өскелең ұрпақтың болашағы нық болады», – деді коалиция мүшесі.
Жаңа Ата Заң жобасы әрбір азаматтың құқығын қорғауға, қоғамдағы тұрақтылық пен бірлікті нығайтуға бағытталған. Осы ретте, Түпқараған ауданы тұрғындарының қызығушылығы мен белсенділігі жаңа Конституция жобасын қолдайтынын көрсетті.
