Манаш Қозыбаев атындағы Солтүстік Қазақстан университетінде жаңа Конституция жобасын талқылауға арналған ашық кездесу өтті. Іс-шараға «Әділетті және Прогрессивті Қазақстанның Халықтық Конституциясы үшін» жалпыұлттық коалициясының Солтүстік Қазақстан облыстық филиалының өкілдері, оқу орнының басшылығы, студенттер мен белсенді жастар қатысты.
Кездесудің негізгі өзегі – конституциялық реформалардың ел дамуына ықпалы және қоғамдық өзгерістер үдерісіндегі жастардың рөлі болды.
Университет ректоры Ербол Исақаев жаңа Конституцияда ғылым, білім және инновацияларды мемлекеттік саясаттың стратегиялық басым бағыттары ретінде бекітудің маңызын атап өтті. Оның айтуынша, құжаттың басты назарында – адам капиталын дамыту мәселесі.
«Бүгінде мемлекет ХХІ ғасырдың негізгі құндылығы – адамға инвестиция салуға басымдық беріп отыр. Жаңа Конституцияның преамбуласында ғылым, білім және инновациялардың рөлі нақты айқындалған. Бұл адами әлеуетті арттыру арқылы елдің тұрақты дамуына жол ашады», – деді ректор.
Жиын барысында жастардың қоғамдық белсенділігіне ерекше мән берілді. Облыстық коалиция өкілі Жадыра Жолкенова студенттердің өз құқықтарын білуі мен азаматтық жауапкершілікті сезінуі қоғам дамуының маңызды тетігі екенін жеткізді.
«Жастарға үлкен үміт артылады. Студенттер ең алдымен өз құқықтарын жетік меңгеріп, қоғамдағы орнын айқындауы қажет. Жаңа Конституция белсенді, жауапты әрі саналы ұрпақ қалыптастыруға бағытталған», – деді ол.
Сондай-ақ, «Болашақ» филиалының атқарушы хатшысы Александр Зель негізгі заңды жаңғырту қазіргі заман талаптарына сай келетінін атап өтті.
«Отыз жыл бойы қолданыста болған Конституция тәуелсіздіктің берік негізін қалады. Алайда ел жаңа даму кезеңіне қадам басты. Бұл құқықтық жүйені одан әрі жетілдіруді талап етеді. Жаңа жоба адам құқықтарын басты құндылық ретінде айқындап, мемлекеттік саясаттың өзегіне айналдырады», – деді Александр Зель.
Оның пікірінше, құжатта билік тармақтарының тиімділігін арттыру мен басқару жүйесін оңтайландыру мәселелері де көрініс тапқан.
Кездесу соңында қатысушылар мұндай пікірталас алаңдары құқықтық мәдениетті нығайтып, азаматтық белсенділікті арттыруға ықпал ететінін атап өтті. Студент жастарды елдің қоғамдық өміріне белсенді араласуға шақыра отырып, Қазақстанның болашағы жас буынның қолында екенін жеткізді.
