Атыаау облысы Махамбет ауданында «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері тұрғындармен, еңбек ұжымдарымен және кәсіпкерлермен жүздесті. Кездесудің басты мақсаты – азаматтардың құқығын қорғау, әлеуметтік кепілдіктерді нақтылау және кәсіби еркіндікті қамтамасыз ету тетіктерін түсіндіру.
Махамбет ауданы Сарытоғай ауылында өткен кездесуде жаңа Конституция жобасындағы жер мен табиғи ресурстардың халыққа тиесілі болуы, экологияны қорғау және жергілікті басқаруды дамыту мәселелері жан-жақты талқыланды. Жалпыұлттық коалиция мүшесі, Мәжіліс депутаты Әділ Жұбанов ауыл тұрғындары үшін жер мен судың, ауаның тазалығы – күнделікті тіршілік пен азық-түлік қауіпсіздігінің кепілі екенін атап өтті.
«Жер мен табиғи ресурстар халыққа тиесілі, ал мемлекет меншік құқығын халық атынан жүзеге асырады. Жергілікті өзін-өзі басқаруды дамыту ауыл тұрғындарының өңірлік шешімдерге қатысу мүмкіндігін кеңейтеді. Жаңа Конституция табиғатты қорғау және жер ресурстарын ұтымды пайдалану бағытындағы ортақ жауапкершілікті айқындайды», – деді ол.
Бұдан кейін коалиция өкілдері Махамбет аудандық ауруханасында медицина қызметкерлерімен кездесті. Жиын барысында әлеуметтік кепілдіктер мен медициналық қызметтің қолжетімділігі туралы айтылды. Коалиция өкілі Эльмира Сапарова қызметкерлерге кәсіби қауіпсіздік пен үздіксіз медициналық қызмет көрсетуге бағытталған құқықтық негіздерді түсіндірді.
«Әрбір азаматқа Конституция ең төменгі жалақы мен зейнетақы, жасына немесе денсаулығына қарамастан әлеуметтік қамсыздандыру, сондай-ақ мемлекет есебінен медициналық көмек алуға кепілдік береді. Медицина қызметкерлері қауіпсіз және санитарлық-гигиеналық талаптарға сай еңбек етуге құқылы, ал мемлекет олардың өмірі мен денсаулығын қорғауға міндетті», – деді ол.
Жұмыс сапары Махамбет ауылындағы Нарын бизнес-инкубатор орталығында жалғасты. Ауыл шаруашылығы саласының кәсіпкерлерімен өткен кездесуде коалиция өкілі Еркебұлан Кенжеғалиев ұсынылған нормалардың ауыл шаруашылығы саласының дамуына және бизнес жүргізу қауіпсіздігіне нақты үлес қосатынын атап өтті.
«Жаңа Конституция әділеттілік пен заң үстемдігін нығайтады, заңдарға кері күш қолдануға тыйым салынады. Яғни, фермерлерге құқықтық тұрақтылық береді: салық немесе жер қатынастары кенеттен өзгермейді, меншік құқықтары мен бизнес жүргізу шарттары қорғалған. Болжамды құқықтық орта аграрлық инвестициялар мен инфрақұрылымға сенімді инвестициялауға мүмкіндік береді», – деді ол.
Махамбет ауданындағы кездесулер жаңа Конституция жобасының қоғамның әрбір саласына тікелей әсер ететінін көрсетті. Жалпыұлттық коалиция мүшелері жаңа Конституция елдегі әділетті, әлеуметтік жауапты және прогрессивті қоғамды қалыптастыру жолында ортақ міндетті іске асыруға мүмкіндік беретінін жеткізді. Ауыл тұрғындары, медицина қызметкерлері және кәсіпкерлер ұсынылған нормалардың азаматтардың құқықтарын қорғауға, әлеуметтік кепілдіктерді нығайтуға, ауылдық жерлердегі өмір сапасын арттыруға және агробизнеске тұрақты жағдай жасауға бағытталғанына сенім білдірді.
