Алматы қаласындағы Достық үйінде «Әділетті және Прогрессивті Қазақстанның Халықтық Конституциясы үшін!» жалпыұлттық коалициясының қызметі аясында этномәдени бірлестіктер өкілдерімен кездесу өтті. Іс-шараға Қазақстан Республикасы Парламенті Сенатының депутаты Нурия Ниязова, қалалық мәслихат депутаттары, қалалық коалиция мүшелері, қоғамдық құрылымдар мен қаланың этномәдени бірлестіктерінің өкілдері қатысты.
Кездесуді ашқан Алматы қаласы мәслихатының депутаты Карашаш Джузеева конституциялық реформа бойынша ақпараттық-түсіндіру жұмыстарында және республикалық референдумға дайындық кезеңінде азаматтық қоғам институттары мен этномәдени бірлестіктердің қатысуының маңыздылығын атап өтті.
Өз сөзінде Қазақстан Республикасы Парламенті Сенатының депутаты Нурия Ниязова жаңа Конституция жобасының негізгі ережелері туралы жан-жақты баяндады. Ол «Халық Кеңесін» жоғары консультативтік-қоғамдық орган ретінде құру мәселесіне ерекше тоқталды. Оның айтуынша, Халық кеңесі мемлекет пен қоғам арасындағы тікелей диалогтың тиімді алаңына айналып, ішкі саясат бойынша ұсыныстар әзірлеуге, ұлтаралық келісімді нығайтуға және жалпыұлттық құндылықтарды ілгерілетуге мүмкіндік береді. Бұл институт маңызды мемлекеттік шешімдерді қабылдау процесінде азаматтардың, қоғамдық және этномәдени бірлестіктердің пікірін кеңінен ескеруге жол ашады деп атап өтілді.
Сонымен қатар спикер ұсынылып отырған өзгерістер мемлекет пен қоғам арасындағы жауапты өзара іс-қимыл моделін қалыптастыруға, «Әділетті Қазақстан» қағидаттарын, заң үстемдігін нығайтуға, сондай-ақ қоғамдық бірлік пен тұрақтылықты сақтауға бағытталғанын айтты.
Кездесу барысында Алматы қаласы мәслихатының депутаты Елена Тё және Алматы қаласы Қазақстан халқы Ассамблеясы Медиация кеңесінің төрағасы Жандильда Жакупов сөз сөйледі. Олар конституциялық өзгерістер кезеңінде ұлтаралық келісімнің, қоғамдық диалогтың және қоғамды топтастырудың маңыздылығын атап өтті.
Талқылау аясында қатысушылар пікір алмасып, ұсыныстар білдірді. Олар ақпараттық-түсіндіру жұмыстарына белсенді қатысуға және қоғамдық келісім мен бірлікті нығайтуға бағытталған бастамаларды қолдауға дайын екендіктерін жеткізді.
Кездесу қорытындысы бойынша қатысушылар конституциялық реформа ел дамуының әділеттілікке, жауапкершілікке және тұрақты дамуға негізделген жаңа кезеңін ашатынын атап өтіп, мазмұнды әрі сындарлы диалог үшін ұйымдастырушыларға алғыс білдірді.