Шымкент қаласында Жаңа Конституция жобасын түсіндіру жұмыстары түрлі еңбек ұжымдарында жалғасуда. Осы ретте «Әділетті және Прогрессивті Қазақстанның Халықтық Конституциясы үшін!» қалалық коалиция мүшелері қалалық зағип және нашар көретін азаматтарға арналған арнайы кітапхана ұжымымен кездесу өткізді.
Кездесудің мақсаты – ұсынылып отырған конституциялық өзгерістердің мәні мен маңызын кеңінен түсіндіру, алдағы референдумның ел болашағына әсерін жан-жақты баяндау.
Жұмысшы топ құрамында «AMANAT» партиясы Еңбекші аудандық филиалының атқарушы хатшысы Мақсат Жолдасбеков және партия белсендісі Құрманбек Жарқынбек болды.
Жиын барысында коалиция мүшелері Конституция жобасында көзделген өзгерістердің азаматтардың құқықтары мен бостандықтарын қорғауды күшейтуге, әлеуметтік әділеттілікті нығайтуға және қоғамның шешім қабылдау процесіне қатысу мүмкіндігін арттыруға бағытталғанын атап өтті.
Мақсат Жолдасбеков өз сөзінде инклюзивті қоғам құру мәселесіне тоқталды.
«Жаңа Конституция – әрбір азаматтың құқығын тең дәрежеде қорғауға бағытталған маңызды құжат. Әсіресе, ерекше қажеттілігі бар жандардың мүмкіндіктерін кеңейту, олардың қоғам өміріне белсенді араласуына жағдай жасау – басты міндеттердің бірі», – деді ол.
Ал партия белсендісі Құрманбек Жарқынбек референдумның маңызын атап өтіп:
«Бұл – тек саяси науқан емес, болашаққа деген ортақ жауапкершілік. Әр азамат өз таңдауын жасап, ел дамуына үлес қосуы керек», – деді.
Кездесу ашық форматта өтті. Ұжым қызметкерлері өз сұрақтарын қойып, ұсыныс-пікірлерін білдірді. Қатысушылар ұсынылған өзгерістерге қатысты жан-жақты ақпарат алып, референдумға белсенді қатысуға дайын екендіктерін жеткізді.
