Шымкент қаласында Жаңа Конституция жобасын түсіндіру бағытындағы кездесулер жалғасуда. Осы ретте «Әділетті және Прогрессивті Қазақстанның Халықтық Конституциясы үшін!» коалициясы мүшелері «Asia Trafo» ЖШС ұжымымен жүздесті.
Кездесудің басты мақсаты – Конституцияның жаңа жобасын таныстырып, алдағы референдумның маңызын еңбек ұжымына жан-жақты түсіндіру.
Жұмысшы топ құрамында ҚР Парламенті Сенатының депутаты Айгүл Қапбарова, «AMANAT» партиясы Шымкент қалалық филиалы атқарушы хатшысының орынбасарлары Ербол Байқонысов, Талғат Балтабаев, қалалық партия филиалы жанындағы Партиялық бақылау комиссиясының төрағасы Ғани Ташқараев, Шымкент қаласы Қазақстан Халқы Ассамблеясы төрағасының орынбасары Тахирбек Нишанбаев, мәслихат депутаттары Лазиз Сулайманов пен Асқар Молдабек, сондай-ақ «AMANAT» партиясы Қаратау аудандық филиалының атқарушы хатшысы Данияр Омаров болды.
Жиын барысында Конституция жобасында қарастырылған өзгерістердің негізгі бағыттары – мемлекеттік басқару жүйесін жетілдіру, азаматтардың құқықтары мен бостандықтарын қорғауды күшейту, әлеуметтік әділеттілікті нығайту мәселелері кеңінен түсіндірілді.
Айгүл Қапбарова өз сөзінде Конституциялық жаңғырту елдің ұзақ мерзімді дамуына негіз болатынын атап өтті.
«Біз ұсынып отырған өзгерістер қоғамның сұранысынан туындап отыр. Бұл – билік пен халық арасындағы жауапкершілікті нақтылайтын, әділетті жүйе қалыптастыруға бағытталған қадам. Әрбір азамат референдумда өз ұстанымын білдіру арқылы ел болашағына ықпал етеді», – деді сенатор.
Ал Ербол Байқонысов еңбек ұжымдарымен ашық кездесудің маңыздылығына тоқталды.
«Өндіріс орындарындағы мамандар – ел экономикасының тірегі. Сондықтан Конституциялық өзгерістердің мәнін түсініп, белсенділік таныту – ортақ жауапкершілік. Біз үшін халықтың пікірін есту және оны ескеру маңызды», – деді ол.
Кездесу барысында кәсіпорын қызметкерлері өз сұрақтарын қойып, ұсыныс-пікірлерін білдірді. Ашық форматта өткен жиын қатысушыларға Конституция жобасының мазмұнын тереңірек түсінуге мүмкіндік берді.
