Қызылордада республикалық, өңірлік коалиция өкілдері Руслан Рүстемов, Гүлшат Мұсаева, Садық Мұстафа, Бақтияр Сыздықов және Арайлым Байжігітова «Ассоль» тұз зауытының ұжымымен кездесті.
Еңбек ұжымымен жүздесуде Жалпыұлттық коалиция мүшесі Руслан Рүстемов жаңа Конституция жобасында көрініс тапқан маңызды мәселелерге тоқталды. Жоба «Әділетті Қазақстан» идеясына сүйеніп, заң мен тәртіп үстемдігін, қоғамдық диалогты, жоғары экологиялық мәдениетті, тарихи-мәдени мұраны сақтауды және адам капиталын дамытуды стратегиялық бағыт ретінде айқындаған. Алғаш рет цифрлық ортадағы құқықтарды қорғау нормасы енгізілді. Дербес деректердің қауіпсіздігі, жеке өмірге қол сұқпаушылық, ақпарат еркіндігі және цензураға тыйым салу нақты көрсетілген. Сонымен қатар адвокатураға қатысты арнайы бап енгізіліп, білікті заң көмегіне кепілдік күшейтілді.
Ең бастысы, еңбек нормалары да бір жолға қойылды. Еңбек саласындағы құқықтар әлеуметтік кепілдіктермен сабақтасып жатыр. Жаңа Конституция жобасында әлеуметтік қамсыздандыру мәселелері нақты көрініс тапқан. Жаңа Конституция жобасы еңбек ету құқығын жан-жақты қамтып, оны әлеуметтік әділеттілік, қауіпсіздік және теңдік қағидаттарымен ұштастырады. Бұл – адамға бағдарланған мемлекеттің айқын көрінісі екенін атап өтті.
Ал өңірлік коалиция мүшесі Садық Мұстафа еңбек ұжымын жаңа Конституция жобасын бірауыздан қолдауға шақырды.
Кездесуде зауыт басшысы Нариман Әбжанов коалиция өкілдеріне ризашылығын білдіріп, 15 наурыз күні ұжым болып қолдайтындарын жеткізді.
