Елордадағы «Астана Арена» стадионында өткен «Қайрат» пен «Тобыл» командалары арасындағы футбол матчы барысында конституциялық реформаларды қолдауға бағытталған патриоттық акция ұйымдастырылды.
Матч трибуналарға жиналған көпсанды жанкүйерлердің басын қосып, жарқын спорттық оқиғаға айналып қана қоймай, азаматтық белсенділік пен мемлекеттік бастамаларды қолдаудың маңызды алаңына айналды.
Акцияға қатысушылар бірлік пен патриотизмнің, конституциялық құндылықтарға адалдықтың нышаны ретінде Қазақстан Республикасының Мемлекеттік Туын салтанатты түрде жайып шықты.
Сондай-ақ конституциялық реформаларды қолдауға арналған тақырыптық перформанс өтті. Елді жаңғырту бағытын қолдау мен азаматтық ынтымақтастықтың белгісі ретінде «Жаңа Конституция үшін» деген жазуы бар баннер ашылды.
Еске салайық, елордада жаңа Конституцияның ережелерін түсіндіру аясында іс-шаралар кешені жалғасуда.
Кәсіпкерлер қауымдастығы өкілдерімен, еңбек ұжымдарымен және қала тұрғындарымен кездесулер ұйымдастырылып, ақпараттық сағаттар, ашық диалогтар және қоғамдық талқылаудың өзге де форматтары өткізілуде. Бұл шаралар халықты конституциялық реформалардың мәні мен маңызы туралы жан-жақты ақпараттандыруға бағытталған.
