Астанада «Әділетті және Прогрессивті Қазақстанның Халықтық Конституциясы үшін!» жалпыұлттық коалициясының өкілдері «KEGOC» АҚ еңбек ұжымымен кездесті.
Кездесуді ашқан Астана қалалық мәслихатының депутаты Азамат Айтхожин тіл, дін және ұлтаралық келісім мәселелеріне тоқталып, еліміздің бейбітсүйгіш бағытын атап өтті. Оның айтуынша, жаңа Конституция халық бірлігін нығайтып, адам құқықтарын қорғауды күшейтуге ықпал етеді.
«Қазақстан – 120-дан астам ұлыс өкілдері тату-тәтті өмір сүретін, діни сенім бостандығы қамтамасыз етілген мемлекет. Әр азамат ислам, христиан, буддизм және басқа да діндерді еркін таңдауға құқылы. Бұл – біздің үлкен жетістігіміз, оны сақтауымыз қажет», – деді ол.
Өз кезегінде «Жасыл ел» жастар еңбек жасақтары кеңесінің мүшесі Елдос Абаканов Конституция заманауи шындықты бейнелеп, мемлекет пен қоғамның, экономика мен технологияның өзгерістеріне бейімделуіне мүмкіндік беруі тиіс екенін айтты. Ол сондай-ақ экология және табиғи ресурстарды қорғау мәселелеріне тоқталды.
«Жаңа редакцияда табиғатқа ұқыпты қарау қағидаты күшейтіледі. Конституцияда қоршаған ортаға жауапкершілікпен қарау қажеттігі тікелей бекітіледі. Біз – Қазақстанның біртұтас халқымыз және еліміздің табиғи байлықтарына қамқор болуымыз керек», – деді ол.
Астана қалалық мәслихатының депутаты Қанат Естек жаңа Конституция жобасы азаматтардың белсенді қатысуымен әзірленгенін атап өтті.
«Бұл Конституцияны халықықтық заң деп сеніммен айтуға болады. Алты ай ішінде 10 мыңнан астам ұсыныс түсіп, олар ашық тыңдауларда талқыланды. Қолданыстағы Конституция 1995 жылы шектеулі мамандар тобы тарапынан қабылданған еді, олардың қатарында шетелдік сарапшылар да болды. Жаңа жоба басқарудың заманауи тәсілдерін, азаматтардың құқықтары мен міндеттерін ескеріп, елді жаңа экономикалық және технологиялық сын-қатерлерге бейімдейді», – деді ол.
ҚР ҰКП «Атамекен» Энергетика және ТКШ департаментінің директоры Жақып Хайрушев Конституцияның энергетика саласы үшін маңызына тоқталды. Оның айтуынша, жаңа Негізгі заң кәсіби әрі болжамды басқаруға институционалдық негіз қалыптастырады.
«Мен сала маманы ретінде энергетиканың жауапкершілігі қандай екенін жақсы түсінемін. Бұл жерде кез келген қателік қымбатқа түседі, әр шешімнің артында бүкіл энергожүйенің жұмысы тұр. Жаңа Конституция жүйелік тұрақтылық пен болжамдылық береді», – деген спикер сала үшін маңызды негізгі өзгерістерді атап өтті:
«Болжамдылық: энергетика ұзақмерзімді жоспарлаумен жұмыс істейді, құқықтық мемлекет қағидатын бекіту ережелердің күрт өзгеру қаупін азайтады. Жауапкершілікті шоғырландыру: Парламенттің бірпалаталы моделіне көшу салалық заңдарды жедел қабылдауға мүмкіндік береді. Цифрландырудың конституциялық басымдық ретінде айқындалуы цифрлық платформаларды, режимдерді интеллектуалды басқаруды, предиктивті талдауды дамытуға институционалдық қолдау жасайды. Бұл қағидаттардың Негізгі заңда бекітілуі ұзақмерзімді IT-жобалардың тұрақтылығын қамтамасыз етеді», – деді.
Сондай-ақ ол цифрлық ортадағы құқықтарды және дербес деректерді қорғаудың маңызын атап өтті.
«KEGOC аса маңызды инфрақұрылымды басқарады. Ал киберқауіпсіздік – ұлттық қауіпсіздіктің бір бөлігі. Цифрлық құқықтарды конституциялық қорғау SCADA жүйелерін, байланыс желілерін қорғау талаптарын күшейтіп, жүйелік тұрақтылықты арттырады. Энергетиканың болашағы – күрделі инженерлік шешімдер мен технологияларды ықпалдастыру. Егер мемлекет білім мен технологияны басымдық ретінде айқындаса, бұл саланың инновациялық әрі орнықты дамуына негіз болады», – деді ол.
