Конституцияның жаңа жобасында ұсынылып отырған өзгерістер – еліміздің саяси жаңғыруының жалғасы. Бұл туралы бүгін Жамбыл облысы, Талас ауданына жұмыс сапарымен болған «Әділетті және Прогрессивті Қазақстанның Халықтық Конституциясы үшін!» жалпыұлттық коалицияның мүшелері мәлімдеді. Коалиция мүшелері Қаратау қаласында бірқатар еңбек ұжымымен және тұрғындарымен кездесулер өткізді.

Өңірге арнайы сапармен келген ҚР Парламенті Сенатының депутаты Сәкен Арубаев, Қазақстанның еңбек сіңірген қайраткері, әнші Досымжан Таңатаров тұрғындармен келелі кездесу өткізді. Сондай-ақ, делегация құрамында облыстық қоғамдық кеңестің төрағасы Дүйсеналы Бықыбаев, облыстық мәслихат депутаттары Жұмахан Танкебаев, Айтбала Жолмаханова партия ардагері, ақын Үміт Битенова болды.

Алғашқы кездесу Қаратау қаласындағы «Балалар өнер мектебінде» өтіп, оған 200-ге жуық қала тұрғыны қатысты. Кездесуде Конституция жобасының негізгі бағыттары мен алдағы республикалық референдумның маңызы кеңінен түсіндірілді.

ҚР Парламенті Сенатының депутаты Сәкен Арубаев өз сөзінде конституциялық өзгерістердің елдің тұрақты дамуына негіз болатынын атап өтті.

«Ұсынылып отырған өзгерістер – еліміздің саяси жаңғыруының жалғасы. Конституцияда Тәуелсіздік және аумақтық тұтастық мәселелері берік айқындалып, құқықтық мемлекет қағидаттары нығая түседі. Бұл – болашақ ұрпақ алдындағы жауапкершілік», - деді сенатор.

Қазақстанның еңбек сіңірген қайраткері Досымжан Таңатаров қоғамның белсенді қатысуының маңызын атап өтті. «Бұл құжат жабық түрде емес, халықтың қатысуымен талқыланып жатыр. Референдум – әр азаматтың ел тағдырына тікелей араласуына мүмкіндік беретін маңызды кезең»,- деді ол.

Кездесуде облыстық қоғамдық кеңестің төрағасы Дүйсеналы Бықыбаев пен партия ардагері Үміт Битенова да сөз сөйлеп, әлеуметтік әділеттілік пен азаматтық жауапкершілік қағидаттарына тоқталды. Қаратау қаласының жұртшылығы атынан бірқатар азамат пікір білдіріп, конституциялық реформаны қолдайтындарын жеткізді.

Бұдан кейін делегация «Talas Investment company» ЖШС-на барды. Кәсіпорында өткен жүздесуде реформаның экономикалық тұрақтылықты нығайтуға және өндірістік әлеуетті арттыруға ықпалы сөз болды.

Іссапар одан әрі «Қазфосфат» ЖШС «Шолақтау» тау-кен өңдеу кешенінде жалғасты. Жұмысшылармен өткен кездесуде өндіріс саласының дамуы мен еңбек адамының құқықтарын қорғау мәселелері талқыланды.

Сондай-ақ делегация №3 арнаулы әлеуметтік қызметтер көрсету орталығында болды. Мұнда Конституция жобасындағы әлеуметтік кепілдіктер мен адам құқықтарын қорғау тетіктері кеңінен түсіндірілді.

Жалпы, жұмыс сапары барысында төрт нысан қамтылып, кездесулер ашық диалог түрінде өтті.