Өскемен қаласындағы «Қазцинк» ЖШС алаңында «Әділетті және Прогрессивті Қазақстанның Халықтық Конституциясы үшін» жалпыұлттық коалициясының мүшелері кәсіпорынның еңбек ұжымымен кездесті. Жүздесуге Премьер-Министрдің орынбасары – Мәдениет және ақпарат министрі, коалиция төрағасының орынбасары Аида Балаева, Мәжіліс депутаттары, ҚР Кәсіподақтар федерациясының төрағасы Сатыбалды Даулеталин, сондай-ақ кәсіпорын мамандары қатысты.
Кездесу барысында Аида Балаева металлургияның Қазақстан экономикасындағы маңызды рөлін атап өтті. Бұл сала елдің экспорттық әлеуетін қалыптастырып қана қоймай, жұмыспен қамтуды қамтамасыз етеді және құрылыс, машина жасау және энергетика салаларының дамуын ынталандырады. Сондай-ақ, ол жаңа Конституцияның еңбек, қауіпсіздік және қызметкерлердің әлеуметтік қорғалу мәселелерін тікелей қамтитынын ерекше атап өтті.
«Көп жылдар бойы Қазцинк әлемдік түсті металдар нарығында Қазақстанның ең қатал бәсекеге төтеп бере алатынын дәлелдеді. Бұл – сіздердің еңбектеріңіздің, өз істеріңізге деген жауапкершіліктің және кәсіби шеберліктеріңіздің нәтижесі. Алайда өнеркәсіпті әрі қарай дамыту, білікті мамандарды сақтау және инвестицияларды тарту үшін бізге ішкі саяси тұрақтылық пен ережелердің болжамдылығы бұрынғыдан да қажет. 15 наурызда жаңа Конституцияға арналған референдум өтеді. Бұл – формальдылық емес, әрбір азаматқа мемлекеттік маңызы бар мәселелерге қатысты өз ұстанымын тікелей білдіруге мүмкіндік. Соңғы жарты жыл ішінде Негізгі заңның жаңартылған мәтіні дайындалды. Ел тарихында алғаш рет Конституцияда Тәуелсіздік, Егемендік, аумақтық тұтастық пен басқару формасы өзгермейтіндігі тікелей бекітілді», – деді вице-премьер.
Сонымен қатар, Аида Балаева еңбек ұжымдарына тікелей қатысты нормаларды жеке атап өтті:
«Негізгі заң еңбек етуге, қауіпсіз еңбек жағдайларына және әділ жалақыға дискриминациясыз құқықты бекітеді. Бұл нормалар өндірістік жарақаттануды азайтуға және қызметкерлердің денсаулығын сақтауға бағытталған. Яғни, жұмыс беруші мен мемлекеттің еңбек жағдайы үшін жауапкершілігі ең жоғарғы деңгейде – Конституцияда бекітілген. Заң үстемдігі принципі жұмыс істейтін елде болжамдылық жоғары, тәуекелдер төмен, болашаққа сенім артады. Бұл – кәсіпорындар мен жұмысшылардың отбасыларына үлкен мүмкіндіктерге жол ашады. Ең басты өзгеріс – Конституцияның өзегінде адам тұр. Оның құқықтары, қауіпсіздігі, еңбегі бірінші орында», – деді А.Балаева.
Мәжіліс депутаты Сергей Пономарев өз сөзінде жаңа Конституция жобасында цифрлық дәуірдегі жағдайлар ескерілгенін және адам құқықтарын онлайн ортада қорғау нығаятынын айтты:
«Енді интернеттегі хат-хабар алмасуды, зияткерлік меншік құқықтарын қорғау сияқты маңызды нормалар конституциялық деңгейде бекітіледі. Мемлекет дербес деректерді конституциялық деңгейде қорғайтыны айқын көрсетілген. Бұл – деректеріңіздің желіге таралмауын, сатылмауын немесе адамға қарсы қолданылмауын қамтамасыз ету үшін өте маңызды. Мемлекет адам құқықтарын тек офлайн – өміріңізді, денсаулығыңызды, қауіпсіздігіңізді ғана емес, онлайн да қорғайды», – деді депутат.
Өнеркәсіп саласының өкілдері де алдағы референдумның экономика тұрақтылығы мен елдіміздегі еңбек ұжымдарының болашағы үшін маңызды екенін атап өтті. Өскемен металлургиялық кешенінің директоры «Қазцинк» ЖШС-ның директоры Тимур Тоқжігітов өз пікірін ортаға салды.
«Қазцинкте шамамен 19 мың адам жұмыс істейді, оның 4 мыңы – Өскемен металлургиялық алаңында еңбек етуде. Қызметкерлердің төрттен бірі – әйелдер, олар кәсіпорынның жалпы жетістігіне өз үлестерін қосып жүр. Еңбек ұжымымыз үшін алдағы референдум – жай саяси оқиға емес, елдің стратегиялық дамуының мәселесі. Біз балаларымызды тәрбиелеп, ұзақмерзімді өндірістік жоспарлар құрамыз. Сол себепті 15 наурызда референдумға міндетті түрде қатысамыз», – деді Тимур Тоқжігітов.
Мысбалқыту цехының аға шебері Аслан Тұрғамбаев жұмысшылардың ұстанымын жеткізді:
«Қазцинк металлургтері – өндіріс адамдары. Біз тәртіпке, жауапкершілікке және нақты нәтижеге үйренгенбіз. Бүгін біз еңбек адамының рөлін нығайтуға бағытталған нақты қадамдарды көріп отырмыз. Жаңартылған Конституция құқықтар мен әлеуметтік қорғанысты күшейтеді, тұрақты әрі әділ жүйені қалыптастырады. 15 наурызда ұжымымыз дауыс беру үшін учаскелерге барады. Біз еңбек бағаланатын, шешімдер ұзақмерзімді нәтижеге бағытталған күшті, тұрақты және дамушы Қазақстанды таңдаймыз», – деді А.Тұрғамбаев.
