Шығыс Қазақстан облысы Глубоков ауданының Солнечное ауылында «Әділетті және Прогрессивті Қазақстанның Халықтық Конституциясы үшін» коалициясының мүшелері арнайы әлеуметтік қызмет көрсету орталығының еңбек ұжымымен кездесу өткізді.
Жүздесуде коалиция өкілдері конституциялық реформаның негізгі бағыттарын жан-жақты түсіндіріп, әлеуметтік қорғау мен еңбеккерлердің құқықтарына қатысты нормаларға ерекше назар аударды. Жаңа редакциядағы Ата заңда әлеуметтік қорғау уақытша қолдау шарасы ретінде емес, мемлекеттің тікелей міндеті ретінде бекітілетіні атап өтілді.
Конституция жобасында ең төменгі жалақыға, зейнетақымен қамтуға, сондай-ақ жасына, денсаулық жағдайына, мүгедектігіне немесе асыраушысынан айырылуына байланысты әлеуметтік қолдауға кепілдіктер қарастырылғаны айтылды. Бұл нормалар өмірдің күрделі жағдайларына тап болған азаматтарды жүйелі түрде мемлекеттік қолдаудың берік құқықтық негізін қалыптастырады.
Коалиция мүшесі Алтай Қалиғожин әлеуметтік әділеттілік қағидатын нақтылау құқықтық мемлекетті нығайтудағы маңызды қадам екенін атап өтті. Оның айтуынша, еңбек адамының құқықтары мен қадір-қасиетін қорғау – қоғамның әділеттілігі мен тұрақтылығының негізгі көрсеткіші.
«AMANAT» партиясының Глубоков аудандық филиалының төрайымы Анна Кузнецова арнаулы әлеуметтік қызмет көрсету орталықтарының қызметкерлері күн сайын қоғамның ең осал санатындағы азаматтармен жұмыс істейтінін, сондықтан олардың өздері де әлеуметтік тұрғыдан қорғалуы тиіс екенін айтты. Оның пікірінше, әлеуметтік нормаларды конституциялық деңгейде нақты бекіту – мемлекет тарапынан осы сала мамандарына көрсетілетін қолдаудың айғағы.
Кездесу барысында еңбек ұжымының өкілдері өздерін қызықтырған сұрақтарын қойып, ұсынылып отырған өзгерістерге қатысты пікірлерін білдірді. Қызметкерлердің бірі әлеуметтік кепілдіктерді күшейтудің маңыздылығын атап өтіп, жаңа Конституция жобасында қызметкерлердің құқықтарын қорғауға басымдық берілуін қолдайтынын жеткізді.
Іс-шара соңында коалиция мүшелері өңірлерде түсіндіру жұмыстары жалғасатынын атап өтті. Мұндай кездесулер азаматтармен ашық диалог орнатуға және конституциялық реформаның негізгі ережелерін мазмұнды талқылауға мүмкіндік береді.