«Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының Түркістан облысындағы жетекшісі, Түркістан облыстық мәслихатының төрағасы Нұралы Әбішов бастаған ақпараттық-насихаттық топ Шардара ауданына келді. Коалиция құрамына еліміздегі жетекші саяси партиялардың өкілдері, Түркістан облыстық мәслихатының депутаттары, жергілікті депутаттық корпус, ғылыми орта өкілдері енді. Олардың қатарында Бекжан Айтқұлов, Жарқынбек Қанаев, Жақсыбай Құрақбаев, Бақытжан Серманизов, Нұржан Әжіметов, Талғат Қаржауов, Бауыржан Шомпиев, Олжас Досекеев, және Бұлтбай Муталиев бар. Ақпараттық-насихаттық топ аудандағы зиялы қауым, бұқаралық ақпарат құралдары өкілдерімен, еңбек ұжымдарымен кездесулер өткізді.
Аудандық кәсіпкерлік палатасы алаңында өткен зиялы қауым өкілдерімен кездесуде конституциялық өзгерістердің сөз бостандығын нығайтуға, ақпарат саласының ашықтығы мен жауапкершілігін арттыруға, азаматтық қоғам институттарының рөлін күшейтуге бағытталған тұстары кеңінен талқыланды. БАҚ және зиялы қауым өкілдері реформалардың медиакеңістік пен қоғамға әсері, қоғам мен билік арасындағы байланысты нығайту мәселелері бойынша өз ойларын ортаға салды.
«Конституциялық өзгерістер елдің саяси жүйесін жаңғыртуға бағытталған нақты қадам. Бұқаралық ақпарат құралдары саласы қоғамның айнасы, зиялы қауым қоғамды тәрбиелейтін орта. Сондықтан журналистердің кәсіби қызметіне жағдай жасау, ақпараттың ашықтығын қамтамасыз ету, зиялы қауымның қадір-қасиетін көтеру реформалардың маңызды бағыты болып саналады», – деп атап өтті Нұралы Әбішов өз сөзінде.
Сонымен қатар коалиция мүшелері “Алтын Констрашн” ЖШС-ы ұжымымен кездесіп, жаңа Конституциялық бастамалардың еңбек адамдарына беретін мүмкіндіктері, еңбек құқықтарын қорғау тетіктері, әлеуметтік қолдау шаралары мен адал еңбек қағидаттарын нығайту мәселелерін сөз етті.
Кәсіпорын қызметкерлері еңбек қауіпсіздігі, әлеуметтік кепілдіктер және жұмысшылардың құқықтарын қорғау бағытындағы жаңашылдықтарға қызығушылық танытты.
«Жаңа өзгерістер еңбек адамын қорғауға, әділ еңбек қатынастарын қалыптастыруға және әлеуметтік тұрақтылықты нығайтуға бағытталған. Бұл өндіріс саласында еңбек ететін азаматтардың құқықтары мен мүмкіндіктерін кеңейтудің нақты тетігі», – деді кездесуде сөз алған Бақытжан Серманизов.
Жалпы, Шардара ауданындағы кездесулер ашық пікір алмасу форматында өтіп, қатысушылар тарапынан қойылған сұрақтарға нақты жауаптар берілді. Өңірлік коалиция өкілдері алдағы уақытта да халықпен және түрлі сала мамандарымен кездесулер жалғасатынын жеткізді.
