Ақтөбе өңірлік коалициясының мүшелері қалалық лқушылар сарайының ұжымына конституциялық реформаның маңыздылығын түсіндіріп, алдағы референдумға қатысуға шақырды.
Ерлан Татимов жаңа Конституция жобасында адамға басымдық беріліп, қоғамның өзекті құндылықтарын, мемлекеттік қағидаттарын бейнелейтінін және саяси институттардың тиімділігін арттыруға бағытталғанын атап өтті. Оның айтуынша, жаңа Негізгі заң жобасы 11 бөлім мен 96 баптан тұрады.
«Ата заң жобасында адам капиталын, білімді, ғылымды, мәдениетті және инновацияларды дамытуға ерекше көңіл бөлінген. Бұл – мемлекет болашағы минералдық ресурстар мен табиғи байлықтарға емес, адам капиталы мен азаматтардың жетістіктеріне байланысты екенін көрсететін маңызды бетбұрыс», – деді ол.
Ол жаңа Конституция жобасы бойынша Қазақстан Республикасы азаматтарының денсаулығын қорғауға және заңмен белгіленген тегін медициналық көмек алуға құқығы бар екенін атап өтті.
«Бүгінгі кездесуде негізінен педагогтер жиналғандықтан, жобада ғылымға, білімге, мәдениетке және адам капиталына ерекше рөл берілгенін атап өткен жөн. Сөз бостандығына, ғылыми, техникалық және көркем шығармашылық еркіндігіне кепілдік беріледі. Ал зияткерлік меншік заңмен қорғалады. Негізгі заңға алғаш рет дербес деректерді қорғау туралы бап енгізілді», – деді Сайлау Камиев.
Райса Байлиева Негізгі заң жобасының 30-бабына назар аударды. Оның айтуынша, Ата Заң жобасында неке мен отбасы, ана, әке және бала мемлекет қорғауында болатыны көрсетілген. Ал неке – заңға сәйкес мемлекет тіркейтін ерікті әрі тең құқықты ер мен әйелдің одағы болып табылады. Ол бұл дәстүрлі құндылықтарды және әйелдердің құқықтарын ең жоғары құқықтық деңгейде қорғауды күшейтетінін атап өтті.
Бибігүл Биманова жаңа Конституция жобасына сәйкес Қазақстан Республикасы азаматтары табиғатты сақтауға, табиғи байлықтарға ұқыпты қарауға міндетті екенін айтты. Осылайша, коалиция мүшелері жаңа Конституцияны қабылдау – уақыт талабы екенін атап өтті.
