«Әділетті және Прогрессивті Қазақстанның Халықтық Конституциясы үшін!» Жалпыұлттық коалиция өңірлерге сапарын жалғастыруда. Бүгін Қостанайда Мемлекеттік кеңесші Ерлан Қарин мен Коалиция мүшелері «Агромашхолдинг KZ» және «Allur» кәсіпорындарының жұмысшы жастарымен кездесті.
Кездесу барысында Мемлекеттік кеңесші Ерлан Қарин Жаңа Конституция жобасының мазмұнына жан-жақты тоқталып, аталған құжат мемлекеттің алдағы даму бағытын айқындау ісінде басты рөл атқаратынын атап өтті. Ол өз сөзінде Жаңа Конституциядағы негізгі қағидаттардың бірі – адам капиталына, білімге, ғылымға және азаматтардың жетістіктеріне, соның ішінде олардың табысты еңбегіне басымдық беру екенін мәлімдеді. Оның айтуынша, Жаңа Конституция жобасында еңбек адамының мәртебесін арттыруға және кәсіби шеберлік пен еңбексүйгіштік құндылықтарын ілгерілетуге бағытталған нормалар бекітілді.
Өндіріс саласы жастарының атынан «Агромашхолдинг KZ» зауытының техникалық бақылау бөлімінің басшысы Сергей Кирпа және «Allur» компаниясындағы GR PR қызметінің маркетологы Сұлтан Бекмағамбетов сөз сөйледі. Олар саланың тұрақты дамуын қамтамасыз ететін нақты әрі жүйелі ережелер өнеркәсіп секторы үшін аса маңызды екенін атап өтіп, Жаңа Конституция кәсіпорындардың сенімді жұмыс істеуіне қажет жағдай жасайтынын жеткізді.
Кездесу барысында жас мамандар саланың келешегі, кәсіби тұрғыда өсу мүмкіндігі және әлеуметтік кепілдіктер мәселелері жөнінде пікір алмасты. Қатысушылар Жаңа Конституция жобасын еңбек адамының мәртебесін нығайтатын әрі өнеркәсіп секторының тұрақты дамуына қолайлы жағдай жасайтын құжат ретінде қабылдайтындарын мәлімдеп , алдағы референдумға қатысуға ниетті екендерін жеткізді.
