IQOSTANAY SMART-орталығы алаңында «Әділетті және Прогрессивті Қазақстанның Халықтық Конституциясы үшін!» жалпыұлттық коалициясы мүшелері Қостанай облысының мәдениет, креативті индустрия және жастар өкілдерімен кездесу өткізді.
Кездесуде кәсіпкер әрі продюсер Алмас Жали және Uni-Q Group медиахолдингінің бас директоры Мұхамедқали Тауан спикер ретінде сөз сөйледі.
Жиын барысында жаңа Конституция жобасының негізгі ережелері талқыланды. Спикерлер жаңа Негізгі заңның басты өзегі адами капиталды дамыту екеніне тоқталып, білім беру, ғылым, мәдениет пен инновация мемлекеттің стратегиялық басымдығы ретінде бекітілетінін атап өтті. Бұл елдің орнықты дамуы білімге, шығармашылық әлеуетке және азаматтардың кәсіби дамуына салынатын инвестициялармен тікелей байланысты екенін айқындайды.
Өңірдің креативті индустрия өкілдері зияткерлік меншікті қорғау нормаларын конституциялық деңгейде бекіту шығармашылық секторды дербес сала ретінде одан әрі дамытудағы маңызды қадам болатынын атап өтті. Олардың пікірінше, бұл авторлар, бағдарлама әзірлеушілері мен кәсіпкерлер үшін қосымша құқықтық кепілдіктер қалыптастырады.
Кездесу қорытындысы бойынша қатысушылар жаңа Конституция жобасын қолдап, елдің одан әрі дамуы мен құқықтық негіздерін нығайту жолында саналы таңдау жасап, референдумға қатысуға дайын екендерін білдірді.
