Бүгін «Әділетті және Прогрессивті Қазақстанның Халықтық Конституциясы үшін» коалициясының Батыс Қазақстан облыстық филиалының мүшелері «Агрореммаш» кәсіпорны қызметкерлерімен кездесті. 

Коалиция мүшелері А.Сафималиев, С.Ізмұханбетова, Д.Мақатов, С.Быков жаңа Конституцияда бірлік пен ынтымақтың, этносаралық және конфессияаралық келісімінің маңыздылығы, еліміздің аумақтық тұтастықтың өзгеріссіз қалуы, Әділеттілік, Заң және тәртіп, табиғатқа жауапкершілікпен қарау қағидаттарының алғаш рет бекітілуі, білім, ғылым, мәдениет пен инновациялар және цифрландыру өзекті болатынын жеткізді.

«Конституция тек құқықтық шеңберді ғана емес, сонымен қатар мемлекеттің басты құндылықтарын да айқындайды. Қоғам мен билік үшін жалпы бағдарларды қалыптастырады. Осы бағдарлардың негізінде азамат пен мемлекет арасындағы қарым-қатынастың басты қағидасы ретінде Әділеттілік, Заң мен тәртіп бекітілген. Бұл – халықпен санаса отырып қабылданған маңызды шешімдер. Олардың барлығы Жаңа Констиутуция жобасында анық көрсетілген» – деді коалиция мүшесі А.Сафималиев.

Ұсынылған өзгерістер мемлекеттік басқару жүйесін жетілдіруге, оның ашықтығы мен тиімділігін арттыруға бағытталған. Бұл бастамалар мемлекеттік органдардың халық алдындағы есептілігін күшейтіп, шешім қабылдау үдерісіне азаматтардың араласуын кеңейтуді көздейді. Сондай-ақ, заманауи цифрлық технологияларды енгізу арқылы мемлекеттік қызметтердің сапасын жақсарту, бюрократиялық кедергілерді азайту және ресурстарды тиімді пайдалану негізгі басымдықтардың бірі болып отыр.

Сонымен қатар, ұсынылып отырған өзгерістер еліміздің әрбір тұрғынының, соның ішінде еңбек ұжымдары өкілдерінің өз азаматтық ұстанымын танытып, белсенді қатысуын талап ететіні айтылды. Кездесуде жұмысшы мамандардың қоғамның қозғаушы күші екеніне және олардың қоғамдық-саяси үдерістерге араласуы, өз ұстанымын ашық білдіруі, ел дамуына жауапкершілікпен қарауы реформалардың табысты жүзеге асуына тікелей әсер ететіні тілге тиек етілді.