Өскемен қаласындағы Орталық мәдениет үйінде «Әділетті және Прогрессивті Қазақстанның Халықтық Конституциясы үшін!» жалпыұлттық коалициясы мүшелерінің Шығыс Қазақстан облысының шағын және орта бизнесі мен агроөнеркәсіптік кешені өкілдерімен кездесуі өтті. Делегацияны Премьер-министрінің орынбасары, ҚР Мәдениет және ақпарат министрі, Жалпыұлттық коалиция төрағасының орынбасары Аида Балаева бастап барды. Кездесуге ҚР Парламенті Мәжілісінің депутаттары Ұлықбек Тұмашинов пен Сергей Пономарев, коалицияның Өскемен қаласы бойынша төраға орынбасары Сергей Коротин, ҚР Кәсіподақтар федерациясының төрағасы Сатыбалды Дәулеталин және өзге де өкілдер қатысты.
Кездесуді ашқан Премьер-министрдің орынбасары тұрақты әрі болжамды құқықтық ортаны қалыптастырудың маңызын атап өтті. Оның айтуынша, жаңа Конституция жобасы инвестицияларды қорғауды күшейтуге, сот жүйесіне деген сенімді нығайтуға және орнықты экономикалық даму үшін жағдай жасауға бағытталған.
«Кәсіпкер ойын ережелері аяқ астынан өзгермейтініне, инвестициялары қорғалатынына, сот жүйесі дауларды әділ әрі ашық қарайтынына сенімді болуы тиіс. Осындай жағдайда ғана ұзақмерзімді стратегия қалыптасады, жұмыс орындары ашылады, өндіріс дамиды. Сондықтан 15 наурыздағы референдум – осы қағидаттарды ең жоғары конституциялық деңгейде бекітудің тарихи мүмкіндігі. Жаңа Конституция жобасында меншік құқығын қорғау кепілдіктері күшейтіледі, заңдардың кері күшіне тыйым салу бекітіледі, мемлекеттік басқарудың анағұрлым ашық әрі жауапты жүйесі қалыптастырылады. Бұл бизнес үшін тәуекелдер азаяды деген сөз. Ел үшін бұл – тұрақтылықтың нығаюы. Әр азамат үшін – ертеңгі күнге деген сенім», – деп атап өтті Аида Балаева.
Әрі қарай вице-премьер адал бәсекелестік ортаны қалыптастырудағы «Заң және Тәртіп» қағидатының маңызына тоқталды.
«Заң және Тәртіп» қағидаты адал бәсекелестік ортаны қалыптастырады, онда адал бизнес қорғалады, ал көлеңкелі схемаларға жол берілмейді. Әділ ережелер – кәсіпкердің басты тірегі. Мемлекет басшысы еңбек адамының маңызын бекер атап өткен жоқ. Кәсіпкер мен фермер – тәуекелге баратын, жұмыс орындарын ашатын, халықты жұмыспен қамтып, ел экономикасының қуатын қалыптастыратын жандар. Жаңа Конституция экономикалық бастамаларды қолдауға және заң алдында, қоғам алдында, болашақ ұрпақ алдында жауапкершілікті күшейтуге бағытталған. Күшті экономика күшті мемлекетсіз мүмкін емес. Ал күшті мемлекет сенімге, әділдікке және еңбекке құрметке негізделеді. Қазақстанның ертеңі тұрақты, бәсекеге қабілетті әрі өз күшіне сенімді ел болуы бүгін өз қолымызда», – деді А.Балаева.
Кездесу барысында реформаның практикалық қырлары да қозғалды.
«Ондаған жылдар бойы ауыл шаруашылығы «тәуекелді егіншілік аймағы» деп аталып келді. Біз құрғақшылықпен, баға құбылуымен және өкінішке қарай, бюрократиямен күрестік. Енді елдің Негізгі заңы халықты асырап отырған жандардың мүддесін басты орынға қояды. Конституцияда жер мен табиғи ресурстар халыққа тиесілі екені нақты жазылған. Бұл фермер үшін мемлекеттің жайылымдарды тозудан қорғауға, ирригация жүйесін қалпына келтіруге және шөлейттенуге қарсы күресуге міндеттеме алатынын білдіреді. Сонымен қатар заңдардың кері күшіне тыйым салудың бекітілуі – бұл біздің құқықтық қорғанымыз. Яғни, техникаға несие алып немесе инфрақұрылым салғанда, ертең ережелер күрт өзгеріп кетпейтініне сенімді боламыз. 15 наурызда біз ұжым болып елдің жаңа болашағын қолдаймыз», – деді Людмила Цыбенко.
Экономикалық және салалық мәселелермен қатар, қатысушылар реформаның құндылық мәніне де назар аударды. «SAMGA» даму орталығының жетекшісі Әлия Көңілхан ел үшін тек экономикалық өсім қарқыны ғана емес, адамгершілік құндылықтар, берік отбасы және болашақ алдындағы жауапкершілік те маңызды екенін атап өтті. «NIETWOMAN» қоғамдық бірлестігінің төрайымы Алтынай Төлеухан референдум мемлекеттің құндылық архитектурасын ондаған жылдарға айқындайтынын, ал болжамды әрі ашық ережелер сенім, инвестиция және даму негізін қалыптастыратынын, әсіресе әлеуметтік экономика мен әйелдер кәсіпкерлігі үшін аса маңызды екенін жеткізді.
Кездесу соңында ШҚО-ның шағын және орта бизнесі мен агроөнеркәсіптік кешені өкілдері конституциялық өзгерістерді қолдау – тұрақты ережелердің кепілі, заңды құқықтарды қорғау, өндірісті жаңғырту және өңірлердің орнықты дамуына жағдай жасаумен тікелей байланысты екенін атап өтті.
