Шымкент қаласында жаңа Конституция жобасын түсіндіруге бағытталған ақпараттық кездесулер жалғасып жатыр. Осы ретте «Әділетті және Прогрессивті Қазақстанның Халықтық Конституциясы үшін!» қалалық коалиция мүшелері Tengri International School мектебінің ұжымымен кездесу өткізді.
Кездесудің мақсаты – білім беру саласының өкілдеріне Конституцияның жаңа жобасында қарастырылған өзгерістер мен толықтыруларды таныстырып, алдағы жалпыхалықтық референдумның маңызын түсіндіру болды.
Жұмысшы топ құрамында Есімхан Бертаев, Жайна Қарабаева, Нұрсұлтан Төлегенов және Дастан Баширов болды.
Жиын барысында коалиция мүшелері ұсынылып отырған конституциялық өзгерістердің негізгі бағыттарына тоқталды. Атап айтқанда, мемлекеттік басқару жүйесінің тиімділігін арттыру, азаматтардың құқықтары мен заңды мүдделерін қорғау тетіктерін күшейту, қоғам мен мемлекет арасындағы өзара жауапкершілік пен сенімді нығайту мәселелері кеңінен түсіндірілді.
Сонымен қатар, Конституция жобасында қамтылған жаңашылдықтардың құқықтық мемлекетті қалыптастырудағы рөлі ерекше екені атап өтілді. Спикерлердің айтуынша, бұл өзгерістер қоғамдағы әділеттілік пен ашықтық қағидаттарын нығайтуға және мемлекеттік институттардың тиімді жұмыс істеуіне ықпал етеді.
Кездесу ашық диалог форматында өтті. Мектеп ұстаздары ұсынылған өзгерістерге қатысты өз сұрақтарын қойып, пікір алмасты.
Штаб мүшелері білім саласы қызметкерлерін алдағы жалпыхалықтық референдумға белсенді қатысуға және ұсынылып отырған Конституция жобасын қолдауға шақырды.
