«Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері Солтүстік Қазақстан облысы Тайынша ауданында бірқатар кездесу өткізді. Ауданның экономикалық және әлеуметтік әлеуеті айқын көрінетін ірі өндіріс орындарында, мәдениет үйінде және ауруханада ұйымдастырылған іс-шаралар барысында конституциялық реформа өнеркәсіп саласына, әлеуметтік бағытқа және тұрғындардың тұрмысын жақсарту ісіне нақты ықпалы ететіні айрықша атап өтілді.
Алғашқы кездесу «BioOperations» ЖШС зауытында ұйымдастырылды. Астықты терең өңдеумен айналысатын бұл заманауи кәсіпорында 500-ден астам адам еңбек етеді. Мұнда жыл сайын жүздеген мың тонна өнім өңделеді. Әңгімелесу барысында кәсіпорын қызметкерлері экономикалық саясаттың тұрақтылығы, инвестицияларды қорғау және еңбек кепілдігі мәселелерін көтерді.
«Мұндай көлемдегі өндіріс қысқа мерзімді шешімдерге емес, ұзақмерзімді стратегиялық жоспарға негізделуге тиіс. Конституция инвестицияларды қорғау, отандық өндірушілерге қолдау көрсету және мемлекеттік саясаттың әлеуметтік бағыттарын жүйелі жүзеге асыру ісін қамтамасыз етеді. Ал мұндай жағдайда аудан экономикасы тұрақты дамиды», – деді Коалиция мүшесі Ерғали Жұмағұлов.
Ауыл шаруашылығы қызметкерлері кәсіподағының төрағасы Бекет Нұғыманов еңбек адамының құқығын қорғау мәселесіне ерекше тоқталды. Оның айтуынша, қауіпсіз еңбек жағдайына және лайықты жалақыға қатысты кепілдіктің Конституция деңгейінде бекітілуі жұмыс беруші мен мемлекеттің жауапкершілігін арттырады.
Ал аудандық мәдениет үйінде өткен кездесуде тұрғындар ел азаматтарының шешім қабылдау үдерісіне қатысу тетіктерін, жергілікті даму басымдықтарын және қоғамдық бақылау мәселелерін талқылады. Коалиция мүшелері ашықтық пен жауапкершілік қағидаттарын енгізу қадамы мемлекет пен қоғам арасындағы өзара іс-қимылдың жаңа стандарттарын қалыптастыратынын атап өтті. Мамандардың пікірінше, конституциялық реформа азаматтардың басқару ісіне қатысу деңгейін одан әрі арттырады.
Кейін Коалиция мүшелері аудандық ауруханаға барды. 120 орындық стационары және бір ауысымда 400 адам қабылдайтын емханасы бар ірі медициналық мекеменің қызметкерлері жабдықтарды жаңарту, мамандармен қамтамасыз ету және тұрақты қаржыландыру мәселелерін көтерді.
«Денсаулық сақтау саласына қатысты конституциялық кепілдіктер – тұрақты қаржыландырудың, инфрақұрылымды жаңартудың және медицина кадрларын қолдаудың негізі. Әрбір баптың артында нақты пациенттер мен нақты дәрігерлер тұр», – деді Коалиция мүшесі, облыстық мәслихат депутаты Мақсат Құдраттоллаев.
Коалиция мүшелерінің жұмысы «EMC Agro» ЖШС алаңында түйінделді. Бұл ірі агроөнеркәсіп кешені жүздеген адамды жұмыспен қамтып отыр. Кәсіпорын ұжымымен кездесу барысында қайта өңдеу саласын дамыту, азық-түлік қауіпсіздігі және жұмыспен қамтуды қорғау мәселелері талқыланды.
«Қайта өңдеу саласының дамуы – ел ішіндегі қосылған құн мен тұрақты жұмыс орындарының кепілі. Конституциялық реформа экономикадағы әлеуметтік бағдарды күшейтіп, жұмысшы мен кәсіпкер мүддесінің теңгерімін қамтамасыз етуге тиіс», – деді Коалиция мүшесі Абай Әлжанов.
Осылайша, Тайынша ауданының тұрғындары нақты шешімдерге қызығушылық танытып, жұмыс орындарының сақталуы, азаматтардың басқару ісіне қатысу мүмкіндігі, медициналық қызметтің қолжетімділігі және өндірісті қолдау мәселелері жөнінде ашық пікір алмасты.
