«Әділетті және Прогрессивті Қазақстанның Халықтық Конституциясы үшін» жалпыұлттық коалициясының Ұлытау облыстық филиалы түсіндіру жұмыстарын жүйелі түрде жалғастыруда.
Бүгін коалиция мүшелері Жезқазған қалалық мәслихатының төарағасы Раушан Қапарова, «Республика» партиясы Ұлытау облыстық филиалының төрағасы Светлана Оңғарбаева, «Ulytau» телеарнасының журналисі, ақын Мұқағали Сейтқазы және «Ақ жол» партиясы Ұлытау облыстық филиалының өкілі Қаламқас Абдуалиева Жезқазған қаласындағы С.Қожамқұлов атындағы драма театры ұжымымен кездесу өткізді. Кездесу барысында спикерлер Жаңа Конституция жобасында қарастырылған өнер, мәдениет және кино индустриясы салаларына қатысты өзгерістерге кеңінен тоқталды. Атап айтқанда, шығармашылық еркіндікті қолдау, мәдени мұраны сақтау, ұлттық өнерді дамыту және мәдениет қызметкерлерінің әлеуметтік мәртебесін арттыру мәселелері түсіндірілді.
Театр ұжымы өз кезегінде жаңа заң жобасына қолдау білдіріп, алдағы референдумға қатысатындықтарын жеткізді.
«Еліміздің ертеңі үшін, немерелеріміздің болашағы үшін 15-наурызда референдумға барып, бірауыздан дауыс беруіміз керек. Менің дауысым не шешеді деп немқұрайлылық танытуға болмайды. Азаматтық ұстанымымызды танытып, дауыс берген жөн», – деді Қазақстанның Халық әртісі Досжан Жанботаев.
