«Әділетті және Прогрессивті Қазақстанның Халықтық Конституциясы үшін» жалпыұлттық коалициясының мүшелерінің Л.Н.Гумилев атындағы Еуразия ұлттық университетінде профессор-оқытушылар құрамы мен студенттердің қатысуымен жаңа Конституциясы жобасының негізгі қағидаларын түсіндіруге арналған кездесу өтті. Іс-шараға шамамен 500-ге жуық адам қатысты. Жиын барысында құжаттың ғылымды дамытуға, цифрлық құқықтарды қорғауға, еңбек қатынастарын жетілдіруге және мемлекеттік басқару жүйесін одан әрі дамытуға қатысты маңызы талқыланды.
Кездесу барысында жаңа Конституция жобасы мемлекеттілікті нығайтуға, адам капиталын дамытуға және заман талабына жауап беретін заманауи құқықтық жүйені қалыптастыруға бағытталғаны атап өтілді.
Астана қаласы мәслихатының депутаты Нұрлан Өтешев жаңа Конституция жобасында ғылымға ерекше мән берілгенін алға тартты.
«Ғылым, инновация және білім мемлекет дамуының стратегиялық бағыттары ретінде айқындалған», – деген ол «бұл университет мен үшін ерекше қымбат. Студенттік жылдары қоғамдық өмірге белсенді қатысып, түрлі бастамалардың ішінде жүрдім, дәл осы жерде азаматтық белсенділіктің алғашқы тәжірибесін алдым»,- деді.
Жиында Ата заңның жаңа жобасында ғылым, инновация және цифрландыру мәселелеріне ерекше назар аударылып, олардың мемлекет дамуының стратегиялық басымдықтары ретінде белгіленгені айтылды. Сонымен қатар жеке деректерді қорғау, азаматтардың цифрлық кеңістіктегі құқықтарын реттеу және еңбек саласындағы әлеуметтік кепілдіктерді кеңейту мәселелері де кеңінен талқыланды.
«Қазақстан цифрлық дәуірге қадам басты. Сондықтан Конституция жобасында азаматтардың цифрлық құқықтарын, оның ішінде жеке деректердің қорғалуын және адамның құқықтарын офлайн ғана емес, онлайн кеңістікте де реттеу мәселелері қарастырылған. Сонымен қатар құжат ғылымды, білімді және креативті индустрияны дамытуға басымдық береді, өйткені мемлекеттің басты байлығы – адам», - деді Л.Н.Гумилев атындағы Еуразия ұлттық университетінің профессоры, заң ғылымдарының докторы Жамаладен Ибрагимов.
Кездесуге қатысушылар ғылым мен білімді дамыту, қоғамның зияткерлік әлеуетін арттыру елдің тұрақты дамуының негізгі факторларының бірі екенін атап өтті. Технологиялық прогресс пен жасанды интеллекттің қарқынды дамуы жағдайында бұл нормаларды Негізгі заң деңгейінде бекіту инновациялық экономиканы дамытуға және талантты жастарды қолдауға берік құқықтық негіз қалыптастырады.
