Бүгін «Әділетті және Прогрессивті Қазақстанның Халықтық Конституциясы үшін!» өңірлік коалиция мүшелері Кеңес Қосыбаев, Гүлзада Шакуликова, Фатима Тулеева және Жеңіс Абілкарес С.Өтебаев атындағы Атырау университетінің ұжымы мен студенттерімен кездесті.
Кездесу барысында коалиция өкілдері жаңа Конституция жобасындағы негізгі өзгерістерді түсіндіріп, білім, ғылым және инновация салаларына қатысты маңызды нормаларға тоқталды.
«Жаңа Конституция жобасында білім мен ғылымға ерекше мән берілген. Ғалымдар мен зерттеушілердің еркін жұмыс істеуіне, ғылыми ізденістер жүргізуіне барлық жағдай жасалады. Бұл ғылымды дамытуға, жаңа жобалар мен инновацияларды қолдауға және жастардың ғылыммен айналысуына үлкен мүмкіндік береді», – деді коалиция өкілі Жеңіс Абілкарес.
Сонымен қатар жаңа Конституция жобасында зияткерлік еңбек пен шығармашылықты қорғауға ерекше назар аударылған. Бұл әсіресе ІТ, ғылым және креативті индустрия саласында еңбек ететін жастар үшін маңызды. Өйткені олардың авторлық еңбегі мен инновациялық жобалары мемлекет тарапынан қорғалады.
Кездесу соңында коалиция өкілдері университет ұжымы мен студенттерді алдағы референдумға белсенді қатысуға шақырды.
Өз кезегінде қатысушылар жаңа Конституция жобасында білім мен ғылымның дамуына басымдық берілгенін атап өтіп, ұсынылған бастамаларды қолдайтындарын жеткізді.
