Жалпыұлттық коалиция Маңғыстау облысының белсенділері және зиялы қауым өкілдерімен мазмұнды кездесу өткізді. Іс-шара Мұнайлы ауданындағы жаңа «Жайлы мектепте» өтті. Оған педагогтер, белсенді азаматтар, аға буын өкілдері және жастар қатысты. Кездесуде өңірдің болашағына, ауылдық аумақтардың дамуына, ғылым мен білімді ілгерілетуге, сондай-ақ азаматтарға арналған әлеуметтік кепілдіктерге тікелей қатысты мәселелер көтерілді.
Алқалы жиында Мәжіліс төрағасы Ерлан Қошанов соңғы жылдары Маңғыстау облысындағы ұзақ уақыттан бері шешімін таппай келген өзекті мәселелерді шешуде айтарлықтай ілгерілеу бар екенін атап өтті. Президенттің тікелей араласуының арқасында өңірді ауыз сумен қамтамасыз ету, жылумен және электрмен жабдықтау мәселелері шешімін тауып, инженерлік желілер жөнделді, мұнайлы аймақтың экологиялық жағдайы да жақсарды. Ерлан Қошанов тұрғындарға туған өлкенің тағдырына белсене атсалысқандары үшін алғыс білдіріп, Ата заң жобасы аясында жергілікті қауымдастықтар үшін азаматтық белсенділікті танытуға арналған тетіктердің одан әрі кеңейетінін атап өтті.
Өз кезегінде өңір тұрғындары Маңғыстау облысына жоғары деңгейде көңіл бөліп отырғаны үшін Мемлекет басшысына ризашылықтарын білдірді.
Кездесудің негізгі тақырыптарының бірі жергілікті өзін-өзі басқаруды дамыту туралы болды. Жұртшылық қабылданатын шешімдерге нақты ықпал ету тетіктерінің болғаны өздері үшін маңызды екенін атап өтті. Коалиция өкілдері Конституцияда жергілікті өзін-өзі басқару қамтылып қана қоймай, оның күшейе түсетінін айтты. Енді шешімдердің бір бөлігі тек орталық органдарда ғана емес, аудан мен ауыл деңгейінде де қабылданатын болады. Бұл тұрғындарға өз өңірінің тыныс-тіршілігіне көбірек ықпал етуге мүмкіндік береді.
Сондай-ақ Мәжіліс төрағасы жаңа Конституция жобасы кең ауқымды қоғамдық талқылаулар нәтижесінде әзірленгенін атап өтті. Соның негізінде қазіргі және келешектегі сын-қатерлерге жауап беретін құжат қалыптасты. Ата заңның басым бағыты сарқылатын жер байлықтарынан адам әлеуетінің сарқылмас мүмкіндіктеріне ауысты. Жаңа Конституцияның басты мәні – Қазақстан минералдық ресурстарға емес, зияткерлік әлеуетке басымдық береді. Сондықтан құжатта ғылымды, білімді және инновацияларды дамытуды мемлекеттің стратегиялық басымдықтары ретінде бекітетін нормалар енгізіледі. Сондай-ақ ғылыми және техникалық шығармашылық еркіндігіне кепілдік беріледі. Бұдан бөлек, мемлекет есебінен міндетті әрі тегін бастауыш және орта білім алу кепілдіктері, сондай-ақ жоғары білімді конкурстық негізде алу құқығы сақталады. Бұл өңірлерде адами капиталды қалыптастыруға тікелей ықпал етеді. Аталған жаңашыл нормалар мұнайлы өңірдің жұртшылығы тарапынан қолдау тапты.
Әлеуметтік кепілдіктер мен цифрландыру мәселелері де қызу талқыланды. Тұрғындар, әсіресе ауылдық жерлерде медицина мен әлеуметтік қолдауды дамыту перспективалары жөнінде пікір білдірді. Цифрлық технологияларды дамыту қала мен ауыл арасындағы алшақтықты қысқартып, мемлекеттік қызметтерге, білім алуға және жұмыспен қамтуға тең мүмкіндікті қамтамасыз етуге тиіс екені атап өтілді.
Кездесуге қатысушылар жаңа Конституция олардың үміті мен тілектеріне сай келетінін және жас ұрпақтың болашағына қатысты көптеген сұрақтарға жауап беретінін атап өтті. Маңғыстау облысының қоғам белсенділері 15 наурыздағы референдумда жаңа Ата заң жобасын қолдауға дайын екендіктерін білдірді.
