«Әділетті және Прогрессивті Қазақстанның Халықтық Конституциясы үшін!» жалпыұлттық коалициясының өкілдері «KAP Logistics» ЖШС қызметкерлерімен кездесу өткізді.
«KAP Logistics» ЖШС 2006 жылғы 10 сәуірде «ҚазАтомӨнеркәсіп» ҰАК» АҚ жүйесіне кіретін кәсіпорындарды уақытылы материалдық-техникалық қамтамасыз ету мен көліктік-экспедициялық қызмет көрсетуді ұйымдастыру және жедел басқарудың тиімділігін арттыру мақсатында құрылған. Компания теміржол және автокөлік арқылы жүк тасымалдаумен, жүктерді өңдеумен, сондай-ақ қызметкерлерді вахталық ауыстыру жұмыстарын ұйымдастырумен айналысады. Кәсіпорын құрылымына «Орталықтандырылған автотиеу-түсіру базасы», «Шиелі-Сұңқар» және «Оңтүстік» филиалдары кіреді. Бүгінде компанияда 1450 қызметкер еңбек етеді.
Іс-шара барысында қатысушыларға жаңа Конституция жобасының негізгі ережелері және олардың қоғамды одан әрі дамытудағы практикалық маңызы жан-жақты түсіндірілді. Кездесу ашық диалог форматында өтіп, қатысушылар ұсынылып отырған өзгерістерге қатысты сұрақтарын қойып, өз пікірлерімен бөлісті.
«Жаңа Конституция жобасында қоғам мен мемлекет арасындағы өзара іс-қимылды күшейту мақсатында Халық Кеңесін құру арқылы қоғамдық диалогты дамыту қарастырылған. Оның құрамына әртүрлі әлеуметтік топтардың өкілдері енеді, ал Кеңеске заңнамалық бастамалар ұсыну мүмкіндігі беріледі. Ашық жұмыс форматы азаматтардың маңызды мемлекеттік шешімдерді талқылау мен қабылдау үдерісіне кеңінен қатысуына мүмкіндік береді», – деп атап өтті Жалпыұлттық коалицияның Астана қалалық филиалының басшысы Ерлан Каналимов.
Сондай-ақ кездесу барысында мемлекеттік органдар қызметінің ашықтығы мен есептілігі мәселелеріне ерекше назар аударылды. Жаңа Конституция жобасында да мемлекеттік билік қызметінің ашықтығын қамтамасыз ету және қоғамдық бақылау тетіктерін кеңейту қағидаттарын бекіту көзделген. Бұл сыбайлас жемқорлық тәуекелдерін азайтып, мемлекеттік басқарудың тиімділігін арттыруға және биліктің қоғам алдындағы жауапкершілік мәдениетін қалыптастыруға бағытталған.
Кездесу соңында қатысушылар жаңа Конституция жобасын мазмұнды түрде түсіндіргені үшін ұйымдастырушыларға алғыс білдіріп, елдегі тұрақтылықты нығайтуға және мемлекеттің одан әрі ілгері дамуына бағытталған жаңартылған Конституция нормаларын іске асыруға азаматтардың белсенді қатысуының маңыздылығын атап өтті.
