Алматы қаласында «Әділетті және Прогрессивті Қазақстанның Халықтық Конституциясы үшін!» жалпыұлттық коалициясы қалалық филиалының жаңа Конституция жобасын түсіндіру бағытындағы кездесулерін жалғастыруда. Осындай маңызды кездесулердің бірі отандық өндірістегі жетекші кәсіпорындардың бірі – «КЕЛЕТ» АҚ ұжымының қатысуымен өтті.
«КЕЛЕТ» АҚ ширек ғасырдан астам уақыт бойы сорғылар мен сорғы жабдықтарын өндіру саласында кәсіби қызмет атқарып келеді. Жинақталған тәжірибе мен жоғары өндірістік стандарттардың арқасында кәсіпорын сорғы жабдықтары нарығында танылған көшбасшылардың біріне айналды. Компания шығаратын сорғы станциялары сенімді, сапалы және тәжірибеде тексерілген сорғы агрегаттарымен жабдықталады, олардың техникалық көрсеткіштері паспорттық сипаттамаларына толық сәйкес келеді.
Кездесу барысында коалиция өкілдері еңбек ұжымына Халықтық Конституция жобасының негізгі қағидаттарын таныстырып, оның елдегі әділеттілік қағидаттарын нығайтуға, азаматтардың құқықтары мен еркіндігін кеңейтуге, сондай-ақ экономикалық дамудың жаңа мүмкіндіктерін қалыптастыруға бағытталғанын атап өтті.
«КЕЛЕТ» АҚ ұжымы еліміздің болашағына бағытталған конституциялық жаңғыру бастамаларын қолдайтынын білдіріп, әділетті және прогрессивті Қазақстан құру жолындағы реформалардың маңыздылығына тоқталды. Кәсіпорын қызметкерлері жаңа Конституция жобасы қоғамдағы тұрақтылықты нығайтып, елдің тұрақты әрі тиімді дамуына серпін береді деген пікір білдірді.
Алматы қалалық коалиция өкілдері өз кезегінде қоғамның түрлі салаларындағы еңбек ұжымдарымен кездесулер жалғасатынын және Халықтық Конституция жобасының мазмұны мен маңызын түсіндіру жұмыстары алдағы уақытта да белсенді түрде жүргізілетінін атап өтті.
