Қызылорда қаласына қарасты Досан елді мекеніндегі №280 орта мектепте өңірлік коалиция өкілдері ұстаздар қауымымен кездесті.
Жиын барысында коалиция өкілдері ұстаздарға алдағы 15 наурызда өтетін республикалық референдумның маңызын түсіндіріп, жаңа Конституция жобасы еліміздің саяси-құқықтық жүйесін жаңғыртуға бағытталған маңызды құжат екенін атап өтті.
Басқосуда сөз алған Сайлаубай Әбішев ұстаздар қауымының қоғамдағы орны ерекше екенін айтты. Оның пікірінше, мұғалімдер тек білім беріп қана қоймай, елдің болашағын қалыптастыратын тұлғаларды тәрбиелейді. Сондықтан олар әрқашан мемлекет өміріндегі маңызды саяси реформаларды қолдап, халықтың болашағына қатысты бастамаларға белсенді қатысып келеді.
Кездесу барысында сөз алған коалиция мүшелері Ата заң жобасындағы әрбір норма бойынша нақты түсіндірмелер беріп, ұжым мүшелерінің пікірлерін тыңдады.
Білім берудің қоғам қалыптастырудағы рөлі, мұғалім мәртебесі, инфрақұрылымды жаңарту және тәрбиелік жұмыстың маңызы талқыланған кездесуде педагогтар өз пікірін білдіріп, жастардың қабілеті мен шығармашылық мүмкіндіктерін дамыту үшін конституциялық кепілдіктердің маңызды екенін айтты.
Кездесу соңында коалиция өкілдері ұстаздарды ел өміріндегі маңызды саяси науқанға белсенді қатысуға шақырды.
