Ата заңның жаңа жобасында медицина қызметкерлерін Конституция деңгейінде қорғау туралы 27-бапта қауіпсіз және санитарлық-гигиеналық нормаларға сәйкес еңбек жағдайын жасауға кепілдік берілген. Бұл ереже мемлекет пен жұмыс берушілерге жауапкершілік жүктейді.
Медицина қызметкерлерінің өмірі мен денсаулығын жан-жақты қорғау, кәсіби тәуекелдерді азайту көзделген. Осы орайда өңірлік коалицияның ақпараттық-түсіндіру тобы жаңа құжаттағы арнайы салалық және адам құқығы туралы басқа да нормаларды түсіндіру үшін Ақтаудағы №1 облыстық стоматологиялық орталықтың қызметкерлерімен кездесті.
Жиынға қатысқан өңірлік коалиция төрағасы Нұрбек Қарасаев, ұйым мүшелері Оңайбек Әбділов, Нұрлыбек Қарабалин жаңа жобаның 3-бабында көрсетілген тәуелсіздікті қорғау, азаматтардың құқығы мен бостандығын сақтау, заң мен тәртіп үстемдігін қамтамасыз ету, жалпыұлттық бірлікті бекемдеу, халықтың әл-ауқатын арттыру нормаларын түсіндірді.
Сонымен қатар қызметкерлерді Конституциялық референдумда азаматтық ұстанымдарын білдіруге шақырды. Аурухана ұжымы еліміздегі қоғамдық-саяси өзгерістермен танысып, тарихи шешімді қолдады.
