Қызылорда облысы Шиелі ауданында «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері ауыл тұрғындарымен, еңбек ұжымдарымен және белсенді азаматтармен жүздесті. Оның барысында жаңа Конституция жобасындағы өзгерістер басты назарға алды.
Мәселен, «Руханият» орталығында Коалиция мүшелері Қайрат Ерназаров, Баймырза Қожамберлиев және Садық Мұстафа аудандық әйелдер кеңесінің мүшелерімен кездесті. Жиында жаңа Ата заңдағы отбасы институтын қорғау және әлеуметтік кепілдіктер беру мәселелері талқыланды.
Бұдан кейін Коалиция мүшелері «ТТК-Шиелі» ЖШС қызметкерлерімен жүздесті. Өндіріс ошағының жұмысшылары жаңа Конституцияда еңбек адамының құқығын нығайту мәселесі айқындалғанын оң бағалап, еліміздегі ауқымды реформаны қолдайтындарын жеткізді.
Ал Ақмая ауылында Коалиция мүшелері тұрғындармен және аграрлық сала өкілдерімен әңгімелесті. Мұнда жер ресурстарын тиімді пайдалану және жергілікті өзін-өзі басқаруды дамыту сынды ауыл тұрғындары үшін аса маңызды мәселелерге ерекше назар аударылды.
«Жаңа Конституцияда жергілікті өзін-өзі басқару институтына басымдық берілген. Бұл жергілікті маңызы бар мәселелерді, бюджеттің жұмсалуын және өңірдің даму бағытын мәслихаттар арқылы ауыл тұрғындарының өздері бақылауға алуына мүмкіндік береді. Сондай-ақ цифрландыру барысын күшейту арқылы мемлекеттік қызметтер ауыл тұрғындарына бұрынғыдан да қолжетімді бола түседі», – деді Коалиция мүшесі Баймырза Қожамберлиев.
Сапар соңында Б. Қабылұлы атындағы мәдениет үйінде аудан тұрғындарымен ауқымды кездесу өтті. Өз кезегінде, Коалиция мүшесі Садық Мұстафа жаңа Конституция ел болашағы үшін ерекше маңызға ие екенін атап өтті.
«Ата заң – мемлекет пен қоғамның даму бағдарын айқындайтын басты құжат. Сондықтан жаңа Конституцияны қабылдау арқылы еліміздің саяси жүйесі жаңарып, азаматтардың құқығы мен мүмкіндігі кеңейе түседі. Осы орайда, ел тағдырына қатысты маңызды шешімдер қабылданатын кезде азаматтардың белсенділігі аса маңызды», – деді ол.
Кездесулер соңында Шиелі ауданының жұртшылығы 15 наурызда өтетін референдумға белсенді қатысуға ниетті екендерін мәлімдеді.
