Қызылорда облысы Қазалы ауданында «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының өкілдері өңір тұрғындарымен бірқатар кездесу өткізді. Іс-шараларда жаңа Конституция жобасы кеңінен түсіндірілді.
Коалиция өкілдерінің алғашқы кездесуі Қазалы вагон жөндеу депосында өтті. Оған 150-ге жуық теміржолшы қатысты. Жиын барысында аумақтық коалиция жетекшісі Ғазиз Әліш жаңа Конституциядағы негізгі өзгерістерге тоқталды. Сондай-ақ еңбек адамының құқығын қорғау және өндірістегі қауіпсіздікті күшейту тетіктері туралы баяндады.
«1995 жылғы Ата заң тәуелсіз мемлекеттің негізін қалап, елдің қалыптасуында маңызды рөл атқарды. Алайда бүгінгі геосаяси өзгерістер мен қоғамдағы әділеттілікке деген сұраныс жаңа қоғамдық келісімді қажет етеді. Осы орайда жаңа Конституция жобасы әзірленіп, республикалық референдумға ұсынылып отыр. Бұл жаңа Конституция – адамға бағдарланған құжат. Онда ұлттық құндылықтарға басымдық беріліп, әділ еңбекақыға, қауіпсіз еңбек жағдайларына деген құқық айқындалады. Енді еңбек қауіпсіздігі жұмысшының ғана емес, мемлекеттің де жауапкершілігінде болады», – деді Ғазиз Әліш.
Ақпараттық жұмыстар аудан кәсіпкерлерімен жалғасты. Мұнда Жалпыұлттық коалиция мүшесі, облыстық мәслихат депутаты Ибайдулла Тілеп сөз алып, жаңа Конституция жобасындағы кәсіпкерлік белсенділікті дамыту, олардың құқығы мен мүддесін қорғауға бағытталған негізгі қағидаттарға тоқталды. Оның айтуынша, жаңа Конституция әр азаматқа кәсіпкерлік қызметпен еркін айналысуға кепілдік береді.
Коалиция мүшелері аудан жастарымен де жүздесті. «Руханият» орталығында өткен басқосуда жаңа Конституцияда адам капиталы, білім, ғылым және инновация стратегиялық басым бағыттар ретінде айқындалғаны сөз болды. Коалиция мүшесі Күмісбай Серікбаев алдағы референдум әрбір азамат өз таңдауын жасап, елдің даму бағытына үлес қоса алатын маңызды саяси оқиға екенін атап өтіп, аудан жастарын осы кезеңде белсенділік танытуға шақырды.
Қазалы қаласының тұрғындарымен өткен кездесуде жаңа Конституцияның әзірлену барысы мен негізгі саяси жаңашылдықтары сөз болды. Жалпыұлттық коалиция мүшесі, облыстық мәслихат депутаты Нұрлан Имандосов Ата Заң жобасы Парламенттің жұмыс тобы мен Конституциялық комиссия отырыстарында жан-жақты қаралып, қоғам өкілдері мен сарапшылардың ұсыныстары ескеріле отырып дайындалғанын атап өтті.
«Бір палаталы Парламент 45 депутаттан тұрады, олар пропорционалды жүйе бойынша сайланып, өкілеттік мерзімі 5 жыл болады. Сондай-ақ Халық Кеңесі жоғары консультативтік орган ретінде жалпыұлттық диалог алаңы қызметін атқарады. Ал Вице-президент Президенттің атынан мемлекеттік органдармен өзара іс-қимылды жүзеге асырады», – деп атап өтті Нұрлан Имандосов.
Кездесулер барысында Әділетті Қазақстанды құру әрбір азаматтың жауапкершілігі екені айтылып, елдегі өзгерістерге белсене қатысудың маңызы атап өтілді.
