Қызылорда облысы Арал ауданында «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері түрлі сала өкілдерімен бірқатар кездесу өткізді. Оның барысында жаңа Конституция жобасының негізгі бағыттары талқыланды.
Коалиция өкілдері алдымен «Қарашалаң балық» ЖШС ұжымымен кездесіп, пікір алмасты. Жүздесу кезінде жаңа Конституция жобасындағы негізгі өзгерістерге назар аударылып, олардың қоғам дамуына және экономика өсіміне әсері кеңінен түсіндірілді.
Коалиция мүшесі Базарбай Төрахметов Әділетті Қазақстанды құру жолындағы байыпты бастамалардың түпкі мақсаты – әділетті қоғам қалыптастыру, заң үстемдігін орнықтыру және «Халық үніне құлақ асатын мемлекет» қағидатын бекіту екенін атап өтті. Оның айтуынша, ұсынылып отырған жаңа Конституция жобасы осы стратегиялық бағыттардың құқықтық негізін айқындайды. Құжатта азаматтардың құқығы мен бостандығын қорғау тетіктері күшейтіліп, билік тармақтарының тепе-теңдігі мен жауапкершілігі нақтыланды.
Ал «Руханият» орталығында Коалиция мүшелері спорт саласының өкілдерімен жүздесті. Онда конституциялық реформалардың ел дамуының жаңа кезеңіне жол ашатын стратегиялық маңызы талқыланды.
Коалиция мүшесі Дәуренбек Мадинов жаңа Конституция қабылдау қадамы Қазақстан үшін тарихи маңызға ие екенін атап өтті.
«Бүгінде еліміз жаңа даму кезеңіне қадам басуда. Конституциялық реформалар – мемлекеттік басқару жүйесін жетілдіруге, билік тармақтарының теңгерімін нығайтуға және азаматтардың мемлекет ісіне қатысу мүмкіндігін кеңейтуге бағытталған маңызды қадам», – деді ол.
Кездесу барысында спорт саласының қоғамдағы рөлі де ерекше атап өтілді. Жаңа Конституцияда жастардың дамуына жағдай жасау, салауатты өмір салтын қалыптастыру және бұқаралық спортты қолдау мәселелері мемлекеттік саясаттың басым бағыттарының бірі ретінде айқындалғаны айтылды.
Арал қаласының активімен өткен кездесуде Коалиция мүшелері жаңа Конституция жобасының негізгі қағидаттарына тоқталып, адам құқығы мен бостандығын қорғауға бағытталған нормалардың маңызын түсіндірді.
Мәселен, Коалиция мүшесі Арғынбай Асанбаев жаңа Конституцияның басты идеясы – азаматтардың құқығы мен бостандығын қорғау екенін жеткізді.
Бұл ретте, білім саласы қызметкерлерімен өткен кездесуде жаңа Конституция жобасының білім беру жүйесіне қатысты маңызды бағыттары талқыланды. Коалиция мүшесі Нұрсәуле Ембергенова педагогтарды қолдауға бағытталған нормалардың маңызына тоқталды.
Осылайша, Коалиция өкілдері тұрғындарды референдумға белсенді қатысып, Ата заң жобасын қолдауға шақырды.
