Жалпыұлттық коалиция өкілдері жаңа Конституция жобасының құқықтық нормалары туралы түсіндіру жұмыстарын жалғастыруда. Осы мақсаттағы кездесу бүгін Мақтаарал ауданы, «Прогресс-2009» ЖШС-нің мақта өңдеу зауытының жұмысшыларымен өтті. Кездесуге Түркістан облысының мәслихат төрағасы, коалицияның облыстық филиалының төрағасы Нұралы Әбішов, облыстық мәслихат депутаттары Жарқынбек Қанаев, Бақытжан Серманизов, Талғат Қаржауов, саяси партиялардың өкілдері Бекжан Айтқұлов, Жақсыбай Құрақбаев, Мұхтар Сәрсенов, Мақтаарал аудандық мәслихатының төрағасы Қадір Сәрсекбаев қатысты.
Бейресми форматта өткен жиында жаңа Конституция қабылдаудың қоғамдық-саяси және тарихи маңызы айтылып, Ата заң жобасының негізгі ережелері мен жаңашыл нормалары кеңінен қозғалды. Жаңа Конституцияның кіріспе бөлімінде еліміздің құндылық бағдарлары мен саяси-құқықтық дамуының ұзақмерзімді стратегиялық бағыттары айқын көрініс тапқанына баса мән берілді.
«Конституция – мемлекеттің негізгі заңы. Ата заңда мемлекет құрылымы, билік тармақтарының өкілеттігі, азаматтардың құқықтары мен бостандықтары, қоғам мен мемлекеттің негізгі қағидаттары бекітіледі. Жаңа Конституция жобасының басты жаңашылдығы оның барлық құқықтық нормалардың өзегінде – әділеттілік принципі, Заң мен Тәртіп қағидаты негізге алынғанын көреміз. Адам құқықтарын қорғау, азаматтардың мүдделерін сақтау басты орынға қойылды. Жаңа Конституция жобасы экономикалық, саяси, әлеуметтік және өзге де салаларды әрі қарай дамыту, билік органдарының халықпен өзара іс-қимыл тетіктерін жетілдіру, жасампаз қоғам болуымызға жетелейтін құндылықтарды өркендеуіміздің бағдары етіп белгілеу міндеттерін көздейді», – деді Н.Әбішов.
Кездесу барысында ел экономикасының тұрақты дамуы ең алдымен қоғамдағы тұрақтылық пен заң үстемдігіне тікелей байланысты екені атап өтілді. Мемлекетте құқықтық тәртіп орнығып, заң талаптары бәріне бірдей әрі әділ қолданылған жағдайда ғана экономиканың ілгерілеуіне берік негіз қаланатыны айтылды. Осы тұрғыда жаңа Конституцияда көзделген құқықтық нормалар мемлекеттік басқару жүйесін жетілдіріп, заңның үстемдігін қамтамасыз етуге бағытталғаны түсіндірілді.
Жалпыұлттық коалицияның ақпараттық-түсіндіру тобының аудандағы еңбек ұжымдарымен кездесу жиыны «Қазтрансгаз-Атакент» ЖШС-де жалғасты. Газбен қамту саласында еңбек ететін азаматтардың қатысуымен өткен жиында жаңа Ата заңның жобасы қоғамдағы ашықтық пен жауапкершілікті арттыруға мүмкіндік беретінін атап өтілді. Құқықтық жүйенің айқын әрі тұрақты болуы мемлекет жүргізіп отырған экономикалық саясаттың тиімді іске асуына жол ашатыны айтылып, бұл өз кезегінде инвесторлар мен кәсіпкерлер үшін сенімді орта қалыптастырып, елдегі іскерлік белсенділіктің артуына ықпал ететіні сөз болды.
