Ақмола облысының әкімі Марат Ахметжанов педагогтер мен студенттермен кездесу өткізді. Кездесу мемлекет дамуына бағытталған бастамалар мен конституциялық реформалардың маңызын талқылау аясында өтті.
«Алдағы Қазақстан Конституциясына өзгерістер енгізу жөніндегі референдум – мемлекетіміздің дамуындағы маңызды кезең. Елдің Негізгі заңы саяси, әлеуметтік және экономикалық дамудың бағытын айқындайды, ал ұсынылып отырған өзгерістер Әділетті Қазақстан қағидаттарын, ашықтықты және мемлекеттің қоғам алдындағы жауапкершілігін нығайтуға бағытталған. Әрбір азамат өз ұстанымын білдіріп, еліміздің болашағын қалыптастыруға үлес қосуы тиіс», - деді өңір басшысы.
Сондай-ақ, ол осы жиынға білімді әрі белсенді қоғам өкілдерінің – педагогтер мен студент жастардың қатысуы ерекше маңызды екенін айта келе, «Дәл сіздер азаматтық мәдениетті қалыптастырып, жаңа ұрпақты тәрбиелейсіздер және мықты әрі әділетті мемлекеттің негізін қалайсыздар», – деп атап өтті.
Ақмола облысы білім басқармасының басшысы Айнагүл Балташева өңірдегі 1261 білім беру ұйымында 23 мыңнан астам педагог еңбек ететінін айтты. Соңғы жылдары білім беру жүйесіне ерекше көңіл бөлініп келеді, инфрақұрылым дамып, білім сапасын арттыруға жағдай жасалуда. Сонымен қатар өңірдің ерекшеліктерінің бірі – шағын жинақты мектептердің үлесі жоғары, ол шамамен 64%-ды құрайды.
Сондай-ақ, Бурабай ауданы Урымқай орта мектебінің директоры Алтынбек Дағыстан, Ш.Уәлиханов атындағы Көкшетау университеті 4-курс студенті Элеонора Далабаева, Красный Яр ауылы №2 мектебінің бастауыш сынып мұғалімі Надежда Кашкевич және Жоғары техникалық колледж студенті Аллан Жантайқожа алдағы реформалардың маңызы туралы өз пікірлерімен бөлісті.
